Kosovo shimolida qaytadan boshlangan norozilik namoyishlari fonida NATO alyans boshchiligidagi KFOR tinchlikparvar missiyasi doirasida mintaqaga qo‘shimcha kuchlar yuborishga qaror qildi. Dpa agentligi Bryusseldagi harbiy suhbatdoshlariga tayanib yozishicha, qo‘shimcha kuchlar 700 ga yaqin askardan iborat bo‘ladi. Hozirda Kosovoda KFOR missiyasi doirasida 3 800 nafar tinchlikparvar kuchlar bor.
Shimoliy Atlantika alyansi Kosovoga qo‘shimcha kuchlarning birinchi qismi yetti kun ichida joylashtirilishini ma’lum qildi. Agar bu yetarli bo‘lmasa, tezkor zaxiradagi boshqa batalyonga yuqori shay holatga o‘tish buyurildi.
“Tinchlikparvarlar sonining ko‘payishi KFOR’ning Birlashgan Millatlar Tashkiloti Xavfsizlik Kengashi mandatiga muvofiq (Kosovoda) xavfsizlikni ta’minlash uchun yetarli kuchlarga ega bo‘lishi uchun zarur”, — dedi NATOning Neapoldagi ittifoqchi kuchlar qo‘mondonligi rahbari Styuart Mansh.
Kosovodagi tartibsizliklarda 25 nafar tinchlikparvar yaralandi
Hafta boshida Kosovo shimolidagi ma’muriy binolarga etnik serblar tomonidan uyushtirilgan hujumlar oqibatida kamida 50 nafar namoyishchi va KFOR tinchlikparvar missiyasining 25 ga yaqin vakili jarohatlangan. KFOR qo‘shimcha kuchlari respublika shimoliga, jumladan, Zvechan shahriga jo‘natildi — u yerda 26-may kuni serblar yangi merni shahar meriyasiga kuzatib borayotgan politsiyaga hujum qilgan. Kosovo huquq-tartibot xodimlari namoyishchilarga qarata ko‘zni yoshlatuvchi gaz ishlatgan. KFOR kuchlari politsiyaga ma’muriyat binosini qo‘riqlashda yordam berishda davom etmoqda.
Yevropa Ittifoqi Kosovodagi zo‘ravonlikni qoraladi va tomonlarni keskinlikni kamaytirishga chaqirdi. Germaniya tashqi ishlar vazirligi ham xuddi shunday bayonot bilan chiqdi.
Izoh (0)