Европага бу йил қурғоқчилик хавф солмоқда. Бу Европа Иттифоқининг жанубий мамлакатлари – Испания, Португалия ва Францияга энг кўп таъсир кўрсатяпти, Италия тошқинлардан ҳам азият чекмоқда. Болтиқбўйи ва Скандинавияда эса тупроқ намлиги камайган, дейилади Euronews хабарида.
Жанубий Европа жазирама мавсум бошланишига ва бунинг ортидан қишлоқ хўжалигига зарар етказувчи қурғоқчилик кучайишига тайёргарлик кўрмоқда. Энг кўп зарар кўрган ЕИ давлатлари молиявий ёрдам сўраяпти, хусусан, ўта оғир пайтларда фермерларга ёрдам учун “Аграр захира”дан 450 миллион евро миқдорида маблағ ажратилади.
“Бу йил биз Испания мисолида, гидрологик йил бошидан бери ёғингарчилик 30 фоиздан кўпроққа камайганини кўряпмиз. Бу яйловларда чорва боқишга бевосита таъсир кўрсатади. Ҳали йиғиб олинмаган қишки экинларга, шунингдек, баҳорги экинларга ҳам таъсир қилади. Суғориш амалиёти ҳам ўзгарган, чунки сув ҳажми камайган”, — деди Испания қишлоқ хўжалиги, балиқчилик ва озиқ-овқат вазири Луис Планас Пучадес.
Брюсселдаги ЕИ вазирлари йиғилишида Франция, Италия ва Испания номидан Португалия томонидан тақдим этилган ҳисобот вазият ташвишли эканини кўрсатди. Апрель ойи охирида Европа Иттифоқининг 21,6 фоизи “қурғоқчиликдан огоҳлантириш”, 3,2 фоизи эса “тревога” ҳолатида бўлган.
Ёмғир танқислигидан энг кўп Испания ва Португалия зарар кўрмоқда. Болтиқбўйи ва Скандинавия мамлакатларида тупроқ намлиги одатдагидан пасайган.
Испанияда 2022 йил 1-октябрдан 2023 йил 25 апрелгача ўртача кўрсаткичдан 24 фоиз кам ёғингарчилик кузатилди, Франциядаги 101 та департаментдан 26 таси ёз охиригача қурғоқчилик хавфи остида. Бу Португалиянинг қишлоқ хўжалиги фаолиятига ҳам салбий таъсир кўрсатди.
Изоҳ (0)