Qashqadaryo viloyatida faoliyat yurituvchi yana ikki nafar bloger “navbatchi” modda — mayda bezorilikda ayblanib, har biri 5 sutkadan maʼmuriy qamoq bilan jazolandi. Bu haqda viloyat sudi axborot xizmati xabar tarqatdi.
Qayd etilishicha, mazkur ish bugun jinoyat ishlari bo‘yicha Shahrisabz shahar sudining ochiq sud majlisida ko‘rib chiqilgan.
“2023-yil 29-may kuni soat 10:20 larda Shahrisabz shahar IIB, YHXB maʼmuriy binosi oldida oq rangli davlat raqam belgisi yechilgan holda barcha oynalari to‘liq qoraytirilgan Gentra rusumli avtomashina turganligini ko‘rgan shahar IIB YHXB boshlig‘i F.Yangiboyev ushbu avtomashinadan shubhalanib, hujjatlarini tekshirish va ushbu mashinani kimga tegishli ekanini aniqlash uchun borgan. Ushbu avtomashina oldida turgan A.Abdullayev mashina unga tegishli ekanligini maʼlum qilib, o‘zining fuqarolik pasportini bergan. Ammo avtomashinaga tegishli hujjatlarni taqdim qilmasdan, xohlasang o‘zing topib ol, degan. Shunda masʼul YPX inspektorlari M.Karimov, S.Pirmanov va D.Ashurov bilan birga ushbu avtomashinaning kimga tegishli ekanligini aniqlash va sodir qilgan qoidabuzarligi uchun jarima maydoniga joylashtirmoqchi bo‘lganida A.Abdullayevning yonida turgan fuqarolar M.Muzaffarov va U.Karimov IIB xodimlariga nisbatan qo‘pollik qilib, ularga hurmatsizlik va bepisandlik qilgan. Ularga sensirab murojaat qilib, janjal qila boshlagan.
Shundan so‘ng Shahrisabz shahar IIB YHXB boshlig‘i F.Yangiboyev darhol Shahrisabz shahar IIBga qo‘ng‘iroq qilib, vaziyatni tushuntirib, yordamchi kuch yuborishini so‘ragan. Shahrisabz shahar IIB binosi va Shahrisabz shahar IIB YHXB binosi yonma-yon joylashganligi uchun zudlik bilan Shahrisabz shahar IIB boshlig‘ining o‘rinbosari J.Raupov voqea joyiga yetib kelib, A.Abdullayev bilan suhbatlashib, undan ‘ushbu avtomashinaning egasi sizmi?’ deb so‘raganida, A.Abdullayev IIB boshlig‘i o‘rinbosari J.Raupovga nisbatan ham ko‘pchilik fuqarolar oldida ‘sen kimsan?’ deb qo‘pol munosabatda bo‘lgan. M.Muzaffarov va U.Karimovlar esa ularning suhbatiga aralashib, IIB boshlig‘i o‘rinbosari va boshqa xodimlar bilan o‘ta qo‘pol munosabatda bo‘lib, ‘senlar gala vallomatlar jonga tegib ketdinglar, yashab bo‘lmay qoldi’ deb, atrofga ko‘plab odamlarni to‘plab, fuqarolar oldida IIB xodimlarini obro‘sizlantirgan”, — deyiladi viloyat sudi rasmiy maʼlumotida.
Taʼkidlanishicha, IIB boshlig‘i o‘rinbosari J.Raupov M.Muzaffarov va U.Karimovlarga “o‘zingizni bosing, qizishmang” deb aytishiga qaramasdan, ular IIB binosi oldida baqir-chaqir qilib, “senlar shoshmay tur, har biring bilan gaplashamiz hali” deb, ko‘pchilik fuqarolarning oldida jamiyatda yurish-turish qoidalarini qasddan mensimasdan, baqir-chaqir qilib, mayda bezorilik qilgan.
“Shundan so‘ng shu yerda turgan yana bir oq rangli Gentra rusumli, davlat raqam belgisi yechib olingan, barcha oynalarining tusi o‘zgartirilib qoraytirilgan avtomashina turganligi aniqlanib, surishtiruv jarayonida ushbu avtomashina M.Muzaffarovga tegishli davlat raqam belgisi 70 W 102 WA ekanligi, avtomashinaning barcha oynalarining tusi tegishli ruxsatnomasiz o‘zgartirilib qoraytirilganligi, davlat raqam belgisi o‘zboshimchalik bilan yechib olinganligi aniqlangan. Shuningdek, olib borilgan surishtiruv harakatlari davomida A.Abdullayevga tegishli oq rangli Gentra davlat raqami 70 U 102 UA bo‘lgan avtomashinaning barcha oynalarining tusi tegishli ruxsatnomasiz o‘zgartirilib qoraytirilganligi, tegishli ruxsatnomasiz qayta jihoz o‘rnatilganligi, davlat raqam belgisi o‘zboshimchalik bilan yechib olinganligi, tegishli ruxsat olmay turib transport vositasiga tovush chiqaruvchi va yorituvchi maxsus qurilma o‘rnatganligi aniqlangan”, — deyiladi masʼullar maʼlumotida.
Qo‘shimcha qilinishicha, Jinoyat ishlari bo‘yicha Shahrisabz shahar sudining 2023-yil 29-maydagi qaroriga ko‘ra A.Abdullayevga Maʼmuriy javobgarlik to‘g‘risidagi kodeksning 125-moddasi (transport vositalaridan foydalanish qoidalarini buzish) 3-qismi, 5-qismi, 126-moddasi (ko‘zgusimon va (yoki) tusi o‘zgartirilgan (qoraytirilgan) oynali, shuningdek tevarak-atrofni ko‘rishni cheklaydigan qoplamali transport vositalaridan foydalanish) 1-qismi, 127-moddasi (transport vositalarining tovush chiqaruvchi, yorituvchi va boshqa qurilmalaridan foydalanish, ularni o‘rnatish qoidalarini buzish) 2-qismi, 183-moddasi (mayda bezorilik) va 194-moddasi (ichki ishlar organlari xodimining qonuniy talablarini bajarmaslik) 1-qismida tutilgan huquqbuzarliklarni sodir etgan deb topilib, unga kodeksning 34-moddasi (bir necha huquqbuzarlikni sodir etganlik uchun maʼmuriy jazo qo‘llanish) tartibida 5 sutka maʼmuriy qamoq jazosi tayinlangan.
U.Karimov Maʼmuriy javobgarlik to‘g‘risidagi kodeksning 183-moddasida nazarda tutilgan huquqbuzarlikni sodir etgan deb topilib, unga 5 sutka maʼmuriy qamoq jazosi berilgan. M.Muzaffarovga esa shu kodeksning 125-moddasi 5-qismi, 126-moddasi 1-qismi va 183-moddasida nazarda tutilgan huquqbuzarliklarni sodir etgan deb topilib, unga ham 5 sutka maʼmuriy qamoq jazosi tayinlangan.
Izoh (0)