Қашқадарё вилоятида фаолият юритувчи яна икки нафар блогер “навбатчи” модда — майда безориликда айбланиб, ҳар бири 5 суткадан маъмурий қамоқ билан жазоланди. Бу ҳақда вилоят суди ахборот хизмати хабар тарқатди.
Қайд этилишича, мазкур иш бугун жиноят ишлари бўйича Шаҳрисабз шаҳар судининг очиқ суд мажлисида кўриб чиқилган.
“2023 йил 29 май куни соат 10:20 ларда Шаҳрисабз шаҳар ИИБ, ЙҲХБ маъмурий биноси олдида оқ рангли давлат рақам белгиси ечилган ҳолда барча ойналари тўлиқ қорайтирилган Gentra русумли автомашина турганлигини кўрган шаҳар ИИБ ЙҲХБ бошлиғи Ф.Янгибоев ушбу автомашинадан шубҳаланиб, ҳужжатларини текшириш ва ушбу машинани кимга тегишли эканини аниқлаш учун борган. Ушбу автомашина олдида турган А.Абдуллаев машина унга тегишли эканлигини маълум қилиб, ўзининг фуқаролик паспортини берган. Аммо автомашинага тегишли ҳужжатларни тақдим қилмасдан, хоҳласанг ўзинг топиб ол, деган. Шунда масъул ЙПХ инспекторлари М.Каримов, С.Пирманов ва Д.Ашуров билан бирга ушбу автомашинанинг кимга тегишли эканлигини аниқлаш ва содир қилган қоидабузарлиги учун жарима майдонига жойлаштирмоқчи бўлганида А.Абдуллаевнинг ёнида турган фуқаролар М.Музаффаров ва У.Каримов ИИБ ходимларига нисбатан қўполлик қилиб, уларга ҳурматсизлик ва беписандлик қилган. Уларга сенсираб мурожаат қилиб, жанжал қила бошлаган.
Шундан сўнг Шаҳрисабз шаҳар ИИБ ЙҲХБ бошлиғи Ф.Янгибоев дарҳол Шаҳрисабз шаҳар ИИБга қўнғироқ қилиб, вазиятни тушунтириб, ёрдамчи куч юборишини сўраган. Шаҳрисабз шаҳар ИИБ биноси ва Шаҳрисабз шаҳар ИИБ ЙҲХБ биноси ёнма-ён жойлашганлиги учун зудлик билан Шаҳрисабз шаҳар ИИБ бошлиғининг ўринбосари Ж.Раупов воқеа жойига етиб келиб, А.Абдуллаев билан суҳбатлашиб, ундан ‘ушбу автомашинанинг эгаси сизми?’ деб сўраганида, А.Абдуллаев ИИБ бошлиғи ўринбосари Ж.Рауповга нисбатан ҳам кўпчилик фуқаролар олдида ‘сен кимсан?’ деб қўпол муносабатда бўлган. М.Музаффаров ва У.Каримовлар эса уларнинг суҳбатига аралашиб, ИИБ бошлиғи ўринбосари ва бошқа ходимлар билан ўта қўпол муносабатда бўлиб, ‘сенлар гала валломатлар жонга тегиб кетдинглар, яшаб бўлмай қолди’ деб, атрофга кўплаб одамларни тўплаб, фуқаролар олдида ИИБ ходимларини обрўсизлантирган”, — дейилади вилоят суди расмий маълумотида.
Таъкидланишича, ИИБ бошлиғи ўринбосари Ж.Раупов М.Музаффаров ва У.Каримовларга “ўзингизни босинг, қизишманг” деб айтишига қарамасдан, улар ИИБ биноси олдида бақир-чақир қилиб, “сенлар шошмай тур, ҳар биринг билан гаплашамиз ҳали” деб, кўпчилик фуқароларнинг олдида жамиятда юриш-туриш қоидаларини қасддан менсимасдан, бақир-чақир қилиб, майда безорилик қилган.
“Шундан сўнг шу ерда турган яна бир оқ рангли Gentra русумли, давлат рақам белгиси ечиб олинган, барча ойналарининг туси ўзгартирилиб қорайтирилган автомашина турганлиги аниқланиб, суриштирув жараёнида ушбу автомашина М.Музаффаровга тегишли давлат рақам белгиси 70 W 102 WА эканлиги, автомашинанинг барча ойналарининг туси тегишли рухсатномасиз ўзгартирилиб қорайтирилганлиги, давлат рақам белгиси ўзбошимчалик билан ечиб олинганлиги аниқланган. Шунингдек, олиб борилган суриштирув ҳаракатлари давомида А.Абдуллаевга тегишли оқ рангли Gentra давлат рақами 70 U 102 UА бўлган автомашинанинг барча ойналарининг туси тегишли рухсатномасиз ўзгартирилиб қорайтирилганлиги, тегишли рухсатномасиз қайта жиҳоз ўрнатилганлиги, давлат рақам белгиси ўзбошимчалик билан ечиб олинганлиги, тегишли рухсат олмай туриб транспорт воситасига товуш чиқарувчи ва ёритувчи махсус қурилма ўрнатганлиги аниқланган”, — дейилади масъуллар маълумотида.
Қўшимча қилинишича, Жиноят ишлари бўйича Шаҳрисабз шаҳар судининг 2023 йил 29 майдаги қарорига кўра А.Абдуллаевга Маъмурий жавобгарлик тўғрисидаги кодекснинг 125-моддаси (транспорт воситаларидан фойдаланиш қоидаларини бузиш) 3-қисми, 5-қисми, 126-моддаси (кўзгусимон ва (ёки) туси ўзгартирилган (қорайтирилган) ойнали, шунингдек теварак-атрофни кўришни чеклайдиган қопламали транспорт воситаларидан фойдаланиш) 1-қисми, 127-моддаси (транспорт воситаларининг товуш чиқарувчи, ёритувчи ва бошқа қурилмаларидан фойдаланиш, уларни ўрнатиш қоидаларини бузиш) 2-қисми, 183-моддаси (майда безорилик) ва 194-моддаси (ички ишлар органлари ходимининг қонуний талабларини бажармаслик) 1-қисмида тутилган ҳуқуқбузарликларни содир этган деб топилиб, унга кодекснинг 34-моддаси (бир неча ҳуқуқбузарликни содир этганлик учун маъмурий жазо қўлланиш) тартибида 5 сутка маъмурий қамоқ жазоси тайинланган.
У.Каримов Маъмурий жавобгарлик тўғрисидаги кодекснинг 183-моддасида назарда тутилган ҳуқуқбузарликни содир этган деб топилиб, унга 5 сутка маъмурий қамоқ жазоси берилган. М.Музаффаровга эса шу кодекснинг 125-моддаси 5-қисми, 126-моддаси 1-қисми ва 183-моддасида назарда тутилган ҳуқуқбузарликларни содир этган деб топилиб, унга ҳам 5 сутка маъмурий қамоқ жазоси тайинланган.
Изоҳ (0)