Toshkent shahri Chilonzor tumanida 21 yoshli yigit tergovdan qochish maqsadida hojatxonadan pastga sakrab, vafot etdi. Bu haqda IIV matbuot kotibi ma‘lum qildi. 

Unga ko‘ra, 22-may kuni tonggi soat 04:30 larda Chilonzor tumanidagi yo‘l-patrul xizmati maskanida xizmat olib borayotgan YPX inspektorlari tomonidan Gentra rusumli transport vositasi to‘xtatilgan. Mazkur avtomobil yo‘lovchisi 2002-yilda tug‘ilgan X.T. o‘z xatti-harakatlari bilan xodimlarda shubha uyg‘otgani sababli xolislar ishtirokida tekshirilgan va uning yonidan o‘tkir hidli to‘q jigarrang modda borligi aniqlanib, rasmiylashtirib olingan. X.T. va to‘plangan hujjatlar Chilonzor tumani IIO FMBga topshirilgan.

O‘tkazilgan sudga oid kimyoviy ekspertiza xulosasiga ko‘ra, X.T.ning yonidan topilgan modda 53,52 grammlik gashish giyohvandlik moddasi ekani aniqlangan. 

Mazkur holat yuzasidan X.T.ga nisbatan Jinoyat kodeksining 273-moddasi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek, ularni qonunga xilof ravishda o‘tkazish) asosida jinoyat ishi qo‘zg‘atilgan.

Shu kuni soat 18:50 larda X.T. Chilonzor tumani IIO FMBdagi 4-qavatda joylashgan xizmat xonasiga olib ketilayotgan vaqtda hojatxonaga kirishini so‘ragan. X.T. 4-qavatda joylashgan hojatxonaga kirgandan so‘ng, tergovdan qochib yashirinish maqsadida hojatxona derazasidan pastga sakrashi natijasida bosh va tana qismidan turli jarohatlar olgan. Mazkur holat binoga o‘rnatilgan videoyozuv moslamalarida qayd etilgan.

Tuman ichki ishlar xodimlari X.T.ga zudlik bilan tez tibbiy yordam ko‘rsatilishini ta‘minlash maqsadida RSHTYOIMga olib borilib, unga bosh miya yopiq jarohati, bosh miya lat yeyishi, bosh suyagini sinishi, tana a‘zolari gematomasi tashxisi qo‘yilgan. 29-may kuni X.T. kasalxonada vafot etgan. Holat yuzasidan Chilonzor tumani prokuraturasi tomonidan tergovga qadar tekshiruv o‘tkazilmoqda.