“Toshkent” respublika fond birjasi boshqaruv raisi Georgiy Paresishvili UzAuto Motors IPOʼsi yuzasidan “Daryo” muxbirining savollariga javob berib, jarayonda asosiy muammo shaffoflik bilan emas, kutilmalar bilan bog‘liq bo‘ldi deb o‘ylashini taʼkidladi.
Jarayon davomida bozorda axborot yetishmasligi bilan bog‘liq muammo bo‘lmadimi degan savolga Georgiy Paresishvili quyidagicha javob berdi.
“Menimcha, u yerda asosiy muammo maʼlumotlar yetishmasligi bilan bog‘liq emasdi. Shunchaki, kompaniyaning narxga nisbatan kutilmalari haddan tashqari oshirib yuborilgan edi. Yaʼni, ular investorlarning eʼlon qilingan yuqori narxda sotib olishlarini kutishgan. Investorlarda esa bunday yuqori narxda sotib olishga yetarli ishtaha bo‘lmagandek tuyuldi. Menimcha, bu xato bo‘ldi, ehtimol, narx jihatidan kamroq tajovuzkor bo‘lishi kerak edi.
Yana bir tomondan, institutsional investorlar ham yetarli emasdi, chunki O‘zbekistonda, masalan, qimmatli qog‘ozlarni sotib oladigan pensiya jamg‘armasi yo‘q, sug‘urta kompaniyalari qimmatli qog‘ozlarga mablag‘ kiritmaydi. Bu ham omillardan biridir”, — dedi Respublika fond birjasi boshqaruv raisi.
Umuman olganda, kompaniyaning shaffofligi IPO jarayoniga qanday taʼsir qilishi haqidagi savolga Paresishvili shunday javob berdi. “Albatta, kompaniya qanchalik shaffof bo‘lsa, uni sotish shunchalik oson. Yaʼni investorlar shaffoflikni yaxshi ko‘radilar. Ular nimani sotib olayotganini ko‘radi, o‘zlari olgan risklarni baholaydi. Shuning uchun shaffoflik har qanday ommaviy joylashtirish jarayoniga bevosita taʼsir qiladi”, — dedi Paresishvili.
Shuningdek, mutaxassisning qayd etishicha, kompaniya faoliyatini ozmi-ko‘pmi shaffof deyish mumkin. “Menimcha, kompaniya faoliyatini ozmi-ko‘pmi shaffof deyish mumkin. Shaffoflik bilan bog‘liq katta muammo bo‘lgan deb o‘ylamayman. Ehtimol, muammo ko‘proq investorlarning bunday yuqori narxdagi aksiyani sotib olishga tayyor ekanligi haqidagi kutilmalar bilan bog‘liq edi. Menimcha, bu eng katta muammo edi”, — dedi Respublika fond birjasi boshqaruv raisi.
Izoh (0)