“Тошкент” республика фонд биржаси бошқарув раиси Георгий Паресишвили UzAuto Motors IPO’си юзасидан “Дарё” мухбирининг саволларига жавоб бериб, жараёнда асосий муаммо шаффофлик билан эмас, кутилмалар билан боғлиқ бўлди деб ўйлашини таъкидлади.
Жараён давомида бозорда ахборот етишмаслиги билан боғлиқ муаммо бўлмадими деган саволга Георгий Паресишвили қуйидагича жавоб берди.
“Менимча, у ерда асосий муаммо маълумотлар етишмаслиги билан боғлиқ эмасди. Шунчаки, компаниянинг нархга нисбатан кутилмалари ҳаддан ташқари ошириб юборилган эди. Яъни, улар инвесторларнинг эълон қилинган юқори нархда сотиб олишларини кутишган. Инвесторларда эса бундай юқори нархда сотиб олишга етарли иштаҳа бўлмагандек туюлди. Менимча, бу хато бўлди, эҳтимол, нарх жиҳатидан камроқ тажовузкор бўлиши керак эди.
Яна бир томондан, институционал инвесторлар ҳам етарли эмасди, чунки Ўзбекистонда, масалан, қимматли қоғозларни сотиб оладиган пенсия жамғармаси йўқ, суғурта компаниялари қимматли қоғозларга маблағ киритмайди. Бу ҳам омиллардан биридир”, — деди Республика фонд биржаси бошқарув раиси.
Умуман олганда, компаниянинг шаффофлиги IPO жараёнига қандай таъсир қилиши ҳақидаги саволга Паресишвили шундай жавоб берди. “Албатта, компания қанчалик шаффоф бўлса, уни сотиш шунчалик осон. Яъни инвесторлар шаффофликни яхши кўрадилар. Улар нимани сотиб олаётганини кўради, ўзлари олган рискларни баҳолайди. Шунинг учун шаффофлик ҳар қандай оммавий жойлаштириш жараёнига бевосита таъсир қилади”, — деди Паресишвили.
Шунингдек, мутахассиснинг қайд этишича, компания фаолиятини озми-кўпми шаффоф дейиш мумкин. “Менимча, компания фаолиятини озми-кўпми шаффоф дейиш мумкин. Шаффофлик билан боғлиқ катта муаммо бўлган деб ўйламайман. Эҳтимол, муаммо кўпроқ инвесторларнинг бундай юқори нархдаги акцияни сотиб олишга тайёр эканлиги ҳақидаги кутилмалар билан боғлиқ эди. Менимча, бу энг катта муаммо эди”, — деди Республика фонд биржаси бошқарув раиси.
Изоҳ (0)