O‘zbekiston fuqarosi Ukrainadagi jangovar harakatlarda qatnashayotgan vaqtida halok bo‘ldi.
Qayd etilishicha, 23 yoshli SH.T. oilasini boqish maqsadida Rossiyaga ishlash uchun ketgan. U yerda avvaliga salat sexida ishlagan, yollanma ishchilik bilan shug‘ullangan, qurilishda ishlagan. So‘ngra SH.T. Rossiyada mustaqil ravishda kafe ochib, o‘ziga mashina olishga muvaffaq bo‘lgan.
Onasining so‘zlariga ko‘ra, o‘g‘li Rossiya—Ukraina chegarasiga odam olib ketayotganda qo‘lga tushgan va mashinasidan geroin chiqqan. Sh.T. Rossiyada qamoq jazosiga hukm qilingan. Onasining aytishicha, uning o‘g‘li jazo muddatini o‘tayotib, qamoqdan Rossiya Ukrainada olib borayotgan urush uchun “safarbar qilingan”.
Ayol o‘g‘li bilan oxirgi marta 10-sentabr kuni suhbatlashgan. “Farzandim na qurol ushlashni biladi, na armiya xizmatida bo‘lgan”, — deydi marhumning onasi. Ayol o‘g‘lining jasadi (faqatgina beldan tepa qismi) O‘zbekistonga olib kelinganini maʼlum qilgan.
2022-yil avgustda Rossiyaning Perm shahridagi o‘zbek diasporasi Ukraina bilan urushda Rossiyani qo‘llab-quvvatlovchi Amir Temur nomidagi batalyonni tuzgandi. “Permdagi O‘rta Osiyo o‘zbeklari jamiyati” qurultoyida uning rahbari Jahongir Jalolov Rossiyaning Ukrainani demilitarizatsiya qilish va denaziyalashtirish bo‘yicha maxsus harbiy operatsiyasini qo‘llab-quvvatlash kerakligini ta’kidlagan.
Tashqi mehnat migratsiyasi agentligi holatga munosabat bildirib, O‘zbekiston fuqarolaridan bunday da’vatlarga ergashmaslikni, ziddiyatli hududlarga bormaslik va harbiy harakatlarda ishtirok etmaslikni so‘ragan. O‘zbekistonning Rossiyadagi elchixonasi ham vatandoshlarni xorijiy davlatlar hududida ko‘ngilli batalyonlar tuzish va yoki harbiy harakatlarda ishtirok etmaslik haqida ogohlantirgan edi.
Jinoyat kodeksining 154−1-moddasiga ko‘ra, O‘zbekiston fuqarosining chet davlatlarning harbiy xizmatiga, xavfsizlik, politsiya, harbiy adliya organlari yoki shunga o‘xshash boshqa organlariga xizmatga kirishi bazaviy hisoblash miqdorining 300 baravarigacha miqdorda jarima yoki 3 yilgacha axloq tuzatish ishlari bilan jazolanadi. O‘zbekiston fuqarosi yuqoridagi xorijiy davlatlar organlariga xizmatga yollansa, 3 yildan 5 yilgacha ozodlikni cheklash yoxud 3 yildan 5 yilgacha ozodlikdan mahrum qilish bilan jazolanadi.
Izoh (0)