Qo‘qon pedagogika institutining qizlar yotoqxonasiga kamera o‘rnatilgani aniqlangani to‘g‘risida xabar berilgandi. Farg‘ona viloyat IIB holat yuzasidan tergovga qadar tekshiruv o‘tkazilayotganini ma’lum qildi.
Qayd etilishicha, 2-aprel kuni Qo‘qon davlat pedagogika instituti 1-yotoqxonasida yashovchi V.Z. “102” qisqa raqamiga murojaat qilib, o‘z murojaatida talabalarning yechinib-kiyinish xonalariga kuzatuv kamerasi o‘rnatganidan noroziligini bildirgan. Mazkur xabar shu kunning o‘zida tegishli tartibda ro‘yxatga olingan.
“Hozirda mazkur holat yuzasidan Qo‘qon shahar IIB tomonidan tergovga qadar tekshiruv harakatlari olib borilmoqda. Natijasi bo‘yicha qo‘shimcha maʼlumot taqdim etiladi”, — deyiladi munosabatda.
“Kun.uz” nashri Qo‘qon davlat pedagogika institutida o‘quvchi bir necha talaba qizning murojaatini e’lon qilgandi. Talabalarning aytishicha, 1-aprel kuni ularni referendum targ‘ibot tadbiridan zudlik bilan chaqirib, yotoqxonadagi xonani ochib berish so‘ralgan. “Wi-Fi signali yo‘qolib qolayotgani sababli uni kuchaytiruvchi moslama o‘rnatilishi”ni aytishgan.
Qizlar keyinroq o‘rnatilgan moslamani yechib olib, mutaxassislarga olib borib ko‘rsatgan. Ular bu moslama yashirin kamera ekanini aytgan. Kamera ovoz va tasvirni flesh-diskka ham yozib olishini, tarmoq orqali boshqa qurilmaga uzatishi ma’lum qilingan. Ya’ni xonani bu kamera orqali onlayn kuzatib turish imkoni ham bo‘lgan. Qizlar kameraga biriktirilgan 128 Gb hajmdagi flesh-diskni ochib o‘qitib ko‘rishganida kiyim almashtirayotgani ham tasvirga tushganiga guvoh bo‘lishgan.
Oliy ta’lim, fan va innovatsiyalar vazirligi ham holatga munosabat bildirib, vazirlikning Farg‘ona hududiy boshqarmasi mas’ullari tomonidan Qo‘qon pedagogika institutiga borib, vaziyat o‘rganilganini ma’lum qilgan.
Izoh (0)