Shavkat Mirziyoyevning taklifiga binoan Singapur prezidenti davlat tashrifi bilan O‘zbekistonda bo‘lib turibdi. Halima Yaqub tashrifdan oldin “Dunyo” agentligiga bergan intervyusida o‘zbek kompaniyalariga o‘z tavsiyalarini berdi.
Halima Yaqub Singapur prezidenti sifatida O‘zbekistonga ilk davlat tashrifini amalga oshirgani katta sharaf ekanini ta’kidlagan.
“O‘zbekiston prezidentining Singapurga tashrifi chog‘ida rivojlanish sohasidagi tajribamizni o‘rtoqlashganimizdan xursand bo‘ldik. Tashrifim davomida Toshkentdagi Davlat boshqaruvi akademiyasiga boraman, hozir mazkur akademiyada Li Kuan Yu nomidagi Singapur davlat siyosati maktabi, Fuqarolik xizmati kolleji bilan rahbarlik va boshqaruv bo‘yicha dasturlarni amalga oshirish masalalari muhokama qilinmoqda. Umid qilamanki, masʼul lavozimdorlarga ushbu trening foydali bo‘ladi va ularga hozirgi hamda kelajakdagi muammolarni hal qilish uchun zarur bo‘lgan bilim va ko‘nikmalarni egallashlariga ko‘maklashadi”, — deydi u.
Singapur rahbari prezident Shavkat Mirziyoyev bilan ikki mamlakat o‘rtasidagi iqtisodiy aloqalarni mustahkamlash yo‘llarini ham muhokama qilganini ma’lum qildi.
“Tashrifim munosabati bilan Singapur biznes delegatsiyasi Toshkentda bo‘lib turganidan mamnunman. Men ular bilan O‘zbekiston—Singapur biznes forumida uchrashishni intiqlik bilan kutmoqdaman”, — deydi Halima Yaqub.
Uning qayd etishicha, ushbu biznes forum ularga O‘zbekiston hukumati siyosatini yaxshi tushunish hamda mamlakatning, umuman, butun Markaziy Osiyo imkoniyatlarini o‘rganish uchun qulay imkoniyat yaratadi.
“Umumiy rejalashtirish, logistika, raqamli aloqa, taʼlim va salohiyatni oshirish kabi turli sohalarda Singapurning bir qator kompaniyalari O‘zbekistonda faoliyat yuritib kelmoqda. Men ham, shuningdek, o‘zbek kompaniyalarini Singapur va Janubi-Sharqiy Osiyodagi imkoniyatlarni ko‘proq o‘rganishga chaqiraman. Singapur o‘zbek kompaniyalariga ASEAN mintaqasini jalb etish uchun yaxshi bazaga aylanishi mumkin, chunki biz biznes va transport markazi hisoblanamiz”, — deydi Halima Yaqub.
Shavkat Mirziyoyev yanvar oyida Singapurga buyurgan davlat tashrifi chog‘ida O‘zbekiston—Singapur hamkorligining oltita ustuvor yo‘nalishini belgilab bergandi. O‘shanda ustav kapitali 500 million dollar bo‘lgan O‘zbekiston—Singapur investitsiya kompaniyasini tashkil etish yuzasidan kelishuvga ham erishilgan.
Izoh (0)