Ko‘ksaroyda 24-may kuni Singapur prezidentini rasmiy kutib olish marosimi bo‘lib o‘tgandi. Marosimdan so‘ng ushbu qarorgohda O‘zbekiston va Singapur prezidentlari muzokara o‘tkazdi.
Prezident matbuot xizmatining ma’lum qilishicha, uchrashuv avvalida Singapur prezidenti davlatimiz rahbariga O‘zbekistonga davlat tashrifi bilan kelish taklifi va Singapur delegatsiyasiga ko‘rsatilayotgan iliq qabul uchun samimiy minnatdorlik bildirdi. Bo‘lajak O‘zbekiston prezidentligi saylovida katta muvaffaqiyatlar tiladi.
Ushbu oliy darajadagi tashrif ikki mamlakat o‘rtasida diplomatik munosabatlar o‘rnatilganidan buyon o‘tgan 25 yil ichida birinchisi ekani taʼkidlandi.
Shavkat Mirziyoyev 2023-yilning yanvarida Singapurga amalga oshirgan tarixiy tashrifi yakunida hamkorlikning muhim yo‘nalishlari bo‘yicha erishilgan barcha kelishuvlar izchil amalga oshirilayotgani mamnuniyat bilan qayd etildi.
Muzokaralarda siyosiy muloqot va parlamentlararo aloqalarni yanada mustahkamlash, xalqaro tashkilotlar doirasida o‘zaro qo‘llab-quvvatlash, davlat boshqaruvi sohasida kadrlar tayyorlash dasturlarini amalga oshirish, jamoat xavfsizligi va madaniy-gumanitar almashinuv borasidagi muloqotlarni faollashtirish masalalariga katta eʼtibor qaratildi. Savdo-iqtisodiy va investitsiyaviy sohalarda katta yutuqlarga erishilayotgani alohida taʼkidlandi.
Iqtisodiy hamkorlikni kengaytirish istiqbollari batafsil ko‘rib chiqildi. Tashrifning ishbilarmonlik dasturi doirasidagi O‘zbekiston—Singapur biznes-forumi natijalari savdo, logistika, innovatsiyalar, energetika, sog‘liqni saqlash kabi sohalarda yetakchi kompaniyalarning investitsiyaviy sherikligini kengaytirishga xizmat qilishiga ishonch bildirildi.
Oziq-ovqat xavfsizligini taʼminlash va mahsulotlarning Singapur bozoriga yetkazib berilishini yo‘lga qo‘yish masalalari ko‘rib chiqildi. Tomonlar gumanitar loyihalarni amalga oshirish bo‘yicha hamkorlikni kengaytirishga qatʼiy intilishini bildirdi.
O‘zbekiston prezidenti huzuridagi Davlat boshqaruvi akademiyasi negizida tashkil etilgan qo‘shma taʼlim markazi doirasida Singapurning davlat boshqaruvi va boshqaruv kadrlarini tayyorlash borasidagi tajribasini joriy etish muhimligi taʼkidlandi.
Singapurning O‘zbekistondagi oliy taʼlim muassasalari faoliyati hamda ikki mamlakat o‘rtasidagi muntazam madaniy, taʼlim va turizm almashinuvlarining faollashishi qo‘llab-quvvatlandi.
Davlat rahbarlari Markaziy va Janubi-Sharqiy Osiyoda mintaqaviy integratsiyaning dolzarb masalalari yuzasidan fikr almashib, xalqaro maydonda, eng avvalo BMT doirasida hamda O‘zbekistonning Jahon savdo tashkilotiga qo‘shilish jarayonida o‘zaro anglashuv va qo‘llab-quvvatlash darajasi yuqori ekanini qayd etdi.
Izoh (0)