Қўқон педагогика институтининг қизлар ётоқхонасига яширин камера ўрнатганлар жавобгарликка тортилди. Бу ҳақда Олий суд матбуот хизмати хабар берди.
Жиноят ишлари бўйича Қўқон шаҳар судининг 5 майдаги қарорига кўра Қўқон давлат педагогика институтининг Ёшлар масалалари ва маънавий-маърифий ишлар бўйича биринчи проректори О.Б. Маъмурий жавобгарлик тўғрисидаги кодекснинг 46-1-моддаси (шахсий ҳаёт дахлсизлигини бузиш)да кўрсатилган маъмурий ҳуқуқбузарликни содир этган деб топилиб, унга БҲМнинг 15 баравари миқдорида яъни, 4,5 миллион сўм жарима жазоси тайинланган.
Институтнинг таълим технологиялари маркази ходимлари А.М., Б.О. ва бўлим бошлиғи Р.М. ҳам Маъмурий жавобгарлик тўғрисидаги кодекснинг 46-1-моддасида кўрсатилган маъмурий ҳуқуқбузарликни содир этган деб топилиб, уларнинг ҳар бирига БҲМнинг 10 баравари миқдорида яъни, 3 миллион сўмдан жарима жазоси тайинланган.
Хабарда билдирилишича, ушбу қарордан норози тарафлар қонунда белгиланган тартиб ва муддатда Фарғона вилоят судининг апелляция инстанциясига шикоят бериш ва протест билдиришга ҳақли.
Қизлар ётоқхонасига ўрнатилган яширин камера воқеаси
Институт талаба қизларидан бири 4 апрель куни вазирлик Telegram каналининг мулоқот ботига қизлар яшайдиган талабалар турар жойи хоналаридан бирига яширинча кузатиш камераси ўрнатилгани ҳақида маълумот берганди. Фарғона вилоят ИИБ воқеа юзасидан текширув ўтказди. Ҳолат тасдиқлангач, Олий таълим, фан ва инновациялар вазирлиги ушбу воқеа юзасидан хизмат текшируви ўтказилишини ва айбдор шахслар аниқлангач, уларга нисбатан тегишли чоралар кўрилишини маълум қилди. Шундан сўнг бевосита жараёнда иштирок этиб, хизмат вазифасини суиистеъмол қилган 4 нафар масъул ходим, жумладан, воқеада бевосита иштирок этган проректор эгаллаб турган лавозимидан озод этилган ва бир нафар мутахассисга интизомий жазо чораси қўлланилди.
Изоҳ (0)