Singapur prezidenti davlat tashrifi bilan O‘zbekistonga kelgani to‘g‘risida xabar berilgandi. Halima Yaqub tashrifidan oldin bergan intervyusida Singapur qanday qilib rivojlangani haqida gapirdi.
.jpg)
Uning so‘zlariga ko‘ra, Singapur rivojlanishi tarixi tasodifiy emas, balki u qator omillar natijasida, shu jumladan, mamlakat mustaqilligining dastlabki yillarida kashshof avlodning mashaqqatli mehnati va Li Kuan Yuning mohirona rahbarligi ostida asoschi otalarning uzoqni ko‘zlab ish yuritgan rahbarligi natijasida ravnaq topgan.
“Toshkent shahridan ikki baravargina kattalikdagi va tabiiy resurslarga ega bo‘lmagan mo‘jaz shahar-davlatda xalqimizga ish o‘rinlarini yaratish uchun inson kapitali va hayotbaxsh iqtisodiyotni rivojlantirishga katta mablag‘ sarflashga majbur bo‘lgan edik. Biz ochiq iqtisodiyotga ko‘maklashish va xorijiy kompaniyalarni Singapurga sarmoya kiritishga taklif qilish asnosida o‘zimizning Janubi-Sharqiy Osiyodagi strategik o‘rnimizdan foydalandik. Biz ezgu boshqaruvni, qonun ustuvorligi, meritokratiya va halollik tamoyillarini o‘zimizga dasturilamal qilib oldik”, — deydi Halima Yaqub.
Singapur rahbarining ta’kidlashicha, uzoq muddatli rejalashtirish va siyosiy barqarorlik ayrim muvaffaqiyatlarining eng asosiy sabablari sirasiga kiradi. “Mustaqillikka erishganimizdan boshlaboq biz dunyoda raqobatbardosh bo‘lishimiz uchun ingliz tilini ishchi tilimizga aylantirishga qaror qildik, chunki ingliz tili global biznes va savdo tili edi. Bu, shuningdek, irqi va madaniy kelib chiqishidan qatʼi nazar, barcha singapurliklar uchun umumiy muloqot tilini taqdim etdi. Shu bilan birga, bizning ikki tilli siyosatimiz xalqimizning madaniy o‘ziga xosligini saqlab qolishda davom etishini taʼminlamoqda”, — deydi u.
Singapur prezidentining qayd etishicha, yalpi ichki mahsulotidan (YAIM) uch baravar ko‘p bo‘lgan savdo hajmiga ega kichik shahar-davlat sifatida Singapurning ochiq va tashqi dunyoga yo‘naltirilgan mamlakat holida qolishi hamda imkon qadar ko‘proq davlat va sheriklar bilan yaxshi munosabatlar o‘rnatishi muhimdir. Singapur kabi kichik davlatlarga aloqador bo‘lgan iqlim o‘zgarishi va pandemiyaga tayyorlik taʼminlanishi singari ko‘pgina global muammolarning hal qilinishi nuqtayi nazaridan xalqaro hamkorlik muhim hayotiy ahamiyat kasb etadi.
1992-yilda Singapur boshqa rivojlanayotgan mamlakatlar bilan taraqqiyot tajribalarini almashish va ularga bir-biridan o‘rganish imkoniyatini berish uchun Singapur hamkorlik dasturini (SHD) taʼsis etgan. Bu dastur inson resurslarini rivojlantirish davlat qurilishining kaliti ekanligiga bo‘lgan ishonch ustiga qurilgan edi. O‘shandan beri 150 ming nafar xorijiy hukumat amaldorlari SHD doirasida amalga oshirilgan turli-tuman salohiyatni oshirish dasturlaridan foydalanishdi. O‘tgan yili Singapur hamkorlik dasturi o‘zining 30 yilligini nishonladi va men O‘zbekiston rasmiylarining ushbu dasturda yanada ko‘proq ishtirok etishlarini olqishlayman.
Shavkat Mirziyoyevning taklifiga binoan Singapur prezidenti Halima Yaqub 23-may kuni davlat tashrifi bilan O‘zbekistonga kelgandi. Oliy martabali mehmon va Singapur delegatsiyasi a’zolari “Yangi O‘zbekiston” bog‘iga tashrif buyurib, Mustaqillik monumenti poyiga gul qo‘ydi, O‘zbekistonning istiqlol yillaridagi rivojlanishi va ushbu betakror majmuaning yaratilish tarixi bilan tanishdi, milliy madaniy markazlar vakillari bilan uchrashdi. Tashrifning asosiy tadbirlari ertaga bo‘lib o‘tadi.
Izoh (0)