“Maktabimda”, “Tentakcham”, “20-mart” kabi qo‘shiqlari bilan yoshlar orasida ommalashgan xonanda Hamdam Sobirov ikki yildirki aynan “So‘nggi qo‘ng‘iroq” arafasida konsert berishni odat tusiga aylantirdi. “Daryo” muxbirlari konsertda ishtirok etib sahna va uning ortidagi qiziqarli jarayonlar haqida videoreportaj tayyorladi.
Hamdam Sobirovning qo‘shiqlari yoshlarbop, ammo konsertga kelgan tomoshabinlar orasida yoshi ulug‘, nuroniy kishilarni ham uchratdik. Qizig‘i, ular yoshlar bilan birdek xonandaning qo‘shiqlarini ijro etishdi.
Bu yilgi konsertda xonanda yangi qo‘shiqlarga emas, ko‘proq jonli ijroga e’tibor qaratgan. Konsertda yigirmata qo‘shiq ijro etilgan bo‘lsa, ularning deyarli barchasi eski qo‘shiqlardan tarkib topgan. Faqatgina “Laylo” qo‘shig‘i bilan repertuar yangilangan, xolos.
Hamdam Sobirov Gulinur, Mirjon va Mirjalol bilan duet tarona ijro etdi. To‘g‘ri, ularning hammasi o‘ziga xos. Ammo Instagram tarmog‘ida trendga aylangan “Menga o‘xshagani tug‘ilmaydi” qo‘shig‘i chin ma’noda muxlislarga manzur kelgani yaqqol sezildi. Chunki tomoshabinlar qo‘shiqni ijrochilar bilan birdek kuylashdi.
Tomoshabinlar orasida ko‘plab san’at vakillarini uchratish mushkul edi. Xususan, Mavluda Asalxo‘jayeva yosh xonandaning ijodini e’tirof etdi.
— 18 yosh bo‘lmasam ham, Hamdam Sobirovning ijodini yaxshi ko‘raman. Boshqalarga o‘xshamaydi, uning o‘ziga xos imiji bor. “Maktabimda” qo‘shig‘ini eshitsam, yoshligim yodimga tushadi. U bilan hamkorlikda bir nechta qo‘shiqlar yaratdik. U yaxshi xonanda bo‘lish bilan bir qatorda, mahoratli bastakor. Qo‘li hamisha ko‘ksida, — deydi Mavluda Asalxo‘jayeva.
Dasturda qiziqchi Avaz Ohun mehmon san’atkor sifatida ishtirok etdi.
Konsertning o‘ziga xos jihatlari ko‘p bo‘ldi. Xususan, Hamdam Sobirov kiyim ilgichga bir nechta kostyumlarini ilib, navbati bilan ularni muxlislariga tortiq etdi. Klip va konsertlarda foydalanilgan keng retro kostyumlar chin muxlislarga xonandadan estalik bo‘lib qoldi.
O‘tgan yilgi konsertda Dili.me va Rayhon Asadova boshlovchilik qilgandi. Negadir bu yilgi dasturda boshlovchidan foydalanilmadi. Xonandaning o‘zi ko‘proq muxlislari bilan muloqot qilishga harakat qildi.
Xonandaning otasi Bobomurod Sobirov “Daryo” muxbirlariga bergan inyervyusida o‘g‘lining qiyinchilik bilan bugungi kunga erishgani, oila shartnoma pulini to‘lashga qiynalgani haqida qiziqarli ma’lumotlarni aytib o‘tdi. Faqat ulardan boxabar bo‘lish uchun videoni YouTube orqali tomosha qilishingiz kerak.
Izoh (0)