“Мактабимда”, “Тентакчам”, “20 март” каби қўшиқлари билан ёшлар орасида оммалашган хонанда Ҳамдам Собиров икки йилдирки айнан “Сўнгги қўнғироқ” арафасида концерт беришни одат тусига айлантирди. “Дарё” мухбирлари концертда иштирок этиб саҳна ва унинг ортидаги қизиқарли жараёнлар ҳақида видеорепортаж тайёрлади.
Ҳамдам Собировнинг қўшиқлари ёшларбоп, аммо концертга келган томошабинлар орасида ёши улуғ, нуроний кишиларни ҳам учратдик. Қизиғи, улар ёшлар билан бирдек хонанданинг қўшиқларини ижро этишди.
Бу йилги концертда хонанда янги қўшиқларга эмас, кўпроқ жонли ижрога эътибор қаратган. Концертда йигирмата қўшиқ ижро этилган бўлса, уларнинг деярли барчаси эски қўшиқлардан таркиб топган. Фақатгина “Лайло” қўшиғи билан рэпертуар янгиланган, холос.
Ҳамдам Собиров Гулинур, Миржон ва Миржалол билан дуэт тарона ижро этди. Тўғри, уларнинг ҳаммаси ўзига хос. Аммо Instagram тармоғида трендга айланган “Менга ўхшагани туғилмайди” қўшиғи чин маънода мухлисларга манзур келгани яққол сезилди. Чунки томошабинлар қўшиқни ижрочилар билан бирдек куйлашди.
Томошабинлар орасида кўплаб санъат вакилларини учратиш мушкул эди. Хусусан, Мавлуда Асалхўжаева ёш хонанданинг ижодини эътироф этди.
— 18 ёш бўлмасам ҳам, Ҳамдам Собировнинг ижодини яхши кўраман. Бошқаларга ўхшамайди, унинг ўзига хос имижи бор. “Мактабимда” қўшиғини эшицам, ёшлигим ёдимга тушади. У билан ҳамкорликда бир нечта қўшиқлар яратдик. У яхши хонанда бўлиш билан бир қаторда, маҳоратли бастакор. Қўли ҳамиша кўксида, — дейди Мавлуда Асалхўжаева.
Дастурда қизиқчи Аваз Оҳун меҳмон санъаткор сифатида иштирок этди.
Концертнинг ўзига хос жиҳатлари кўп бўлди. Хусусан, Ҳамдам Собиров кийим илгичга бир нечта костюмларини илиб, навбати билан уларни мухлисларига тортиқ этди. Клип ва концертларда фойдаланилган кенг ретро костюмлар чин мухлисларга хонандадан эсталик бўлиб қолди.
Ўтган йилги концертда Dili.me ва Райҳон Асадова бошловчилик қилганди. Негадир бу йилги дастурда бошловчидан фойдаланилмади. Хонанданинг ўзи кўпроқ мухлислари билан мулоқот қилишга ҳаракат қилди.
Хонанданинг отаси Бобомурод Собиров “Дарё” мухбирларига берган инервюсида ўғлининг қийинчилик билан бугунги кунга эришгани, оила шартнома пулини тўлашга қийналгани ҳақида қизиқарли маълумотларни айтиб ўтди. Фақат улардан бохабар бўлиш учун видеони YouTube орқали томоша қилишингиз керак.
Изоҳ (0)