Rossiyaning Belgorod viloyati gubernatori Gladkov Ukraina armiyasining diversion razvedka guruhi Grayvoron okrugiga kirganini ma’lum qildi.
Gladkovning so‘zlariga ko‘ra, Rossiya qurolli kuchlari chegara xizmati Rossiya gvardiyasi va Federal xavfsizlik xizmati bilan birgalikda “dushmanni yo‘q qilish uchun” zarur choralar ko‘rmoqda.
Ijtimoiy tarmoqlarda “Ukraina tanklarining Belgorod viloyatidagi Grayvoron nazorat-o‘tkazish punkti hududiga kirgani” aks etgan video e’lon qilingan. Shu bilan birga, Belgorod viloyati rasmiylari Grayvoron okrugi o‘qqa tutilganini xabar qilgan.
Belgorod viloyatiga Rossiya chegarachilariga yordam berish uchun vertolyotlar va zirhli texnikalar yuborilgani aytilmoqda
Kremlning munosabati
Rossiya prezidenti Vladimir Putin holat bo‘yicha xabardor qilingan. Prezident matbuot kotibi Dmitriy Peskov mazkur harakatlardan ko‘zlangan maqsad haqida fikr bildirdi.
“Biz bunday diversiyaning maqsadini juda yaxshi tushunamiz. U e’tiborni Baxmut yo‘nalishidan chalg‘itish, Ukraina tomoni Artemovskni yo‘qotishining siyosiy ta’sirini minimallashtirishga qaratilgan”, — dedi Peskov.
Peskov ularni Rossiya hududidan siqib chiqarish va ushbu “qo‘poruvchilik guruhini” yo‘q qilish ishlari olib borilayotganini aytdi. Voqea joyida yetarlicha kuch va vositalar mavjudligini bildirdi.
Izoh (0)