Nyu-Yorkda Turkiyaning AQSHdagi bosh konsulligi joylashgan “Turk uyi”ga hujum uyushtirildi. Bu haqda TGRT telekanali xabar berdi.
Noma’lum shaxs bosh konsullik binosining oynalarini temir lom bilan sindirgan. Aynan shu binoda Turkiyadagi prezidentlik saylovlarida ovoz berish jarayoni bo‘lib o‘tmoqda.
Ijtimoiy tarmoqlarda binoning fasadi aks etgan fotosuratlar tarqalmoqda, unda har bir bo‘limda oynalar sindirilganini ko‘rish mumkin.
Avvalroq Turkiya Markaziy saylov komissiyasi prezidentlik saylovlarining ikkinchi bosqichi 28-may kuni bo‘lib o‘tishini rasman e’lon qilgan edi. Shu bilan birga, 20-may kuni xorijda saylovning ikkinchi bosqichi boshlangan. Turkiya fuqarolari ikkinchi turda ikki nomzod – mamlakatning amaldagi prezidenti Rajab Toyyib Erdo‘g‘on va muxolifatning yagona nomzodi Kamol Qilichdaro‘g‘lini tanlaydi.
Turkiya Ichki ishlar vazirligi rahbari Sulaymon Soylu Shvetsiya hukumatini mamlakatdagi prezidentlik saylovlariga aralashishga urinayotganlikda aybladi, unga ko‘ra, Stokgolm saylov komissiyasi va kuzatuvchilarga bosim o‘tkazuvchi uyushmaga homiylik qiladi.
Izoh (0)