Rossiya va Gruziya o‘rtasida to‘g‘ridan to‘g‘ri aviaqatnovlar qayta tiklangani munosabati bilan 19-may kuni kechqurun Tbilisi markazidagi parlament binosi yaqinida norozilik namoyishi o‘tkazildi.
Jurnalistlar Gruziya muxolif partiyalari tomonidan e’lon qilingan ushbu mitingga mingga yaqin odam chiqqanini xabar qilishdi. Namoyishchilar parlament binosi joylashgan Rustaveli prospektini egallab, transport harakatini to‘sib qo‘ygan.
Namoyishchilarning xavotiriga ko‘ra, Rossiyaga parvozlarning qayta tiklanishi sabab Yevropa Ittifoqi Gruziyaga ittifoqqa a’zo bo‘lishga nomzod maqomini berishdan bosh tortishi mumkin.
19-may kuni so‘nggi to‘rt yildan beri Rossiyadan Gruziyaga birinchi to‘g‘ridan to‘g‘ri reys amalga oshirildi va “Azimut” aviakompaniyasining samolyoti Tbilisi aeroportiga qo‘ndi. Gruziya muxolifati tarafdorlari aeroportda norozilik namoyishi o‘tkazdi.
Rossiya hukumati 10-may kuni Gruziya fuqarolari uchun viza rejimini va bu mamlakat bilan to‘g‘ridan to‘g‘ri reyslarni taqiqlash qarorini bekor qildi. Bu haqdagi farmonni Rossiya prezidenti Vladimir Putin imzolagan.
Gruziya prezidenti Salome Zurabishvili buni tanqid qildi. Uning so‘zlariga ko‘ra, to‘g‘ridan to‘g‘ri reyslarning qayta tiklanishi va vizalarning bekor qilinishi “Rossiya Ukrainaga qarshi tajovuzni davom ettirib, Gruziyaga tegishli hududlarni okkupatsiya qilayotgan bir paytda nomaqbuldir”.
Izoh (0)