“Gruziya orzusi” partiyasi hukumat tepasida ekan, Gruziya hududida ikkinchi front ochilishiga yo‘l qo‘yilmaydi, dedi mamlakat bosh vaziri Irakliy Garibashvili.
Gruziyada hokimiyat almashinuvi va ikkinchi front ochilishi haqidagi gap-so‘zlar Tbilisi markazidagi norozilik namoyishlaridan keyin yana avj oldi. Namoyishda minglab odamlar “xorijiy agentlar” haqidagi qonunning qabul qilinishiga qarshi chiqqandi. Natijada hukmron partiya uni parlamentdan qaytarib oldi.
“So‘nggi kunlarda biz ikkinchi front ochilishi va mamlakatdagi beqarorlikni qo‘llab-quvvatlayotgan odamlar haqida to‘liq tasavvurga ega bo‘ldik. Bu yerda 300 dan ortiq nodavlat notijorat tashkilotlar va, albatta, ‘Yagona milliy harakat’ birlashgan. ‘Yagona milliy harakat’ning asosiy maqsadi — Gruziyani urushga tortish”, — dedi Garibashvili “Imedi” telekanalida.
“Ukrainadan ko‘plab odamlar kelganidan xabarim bor. Ularga murojaat qilmoqchiman: bu yerda biror nima bo‘ladi, degan xayollarga bormang. Hech narsa bo‘lmaydi, birodarlar. Men Ukrainadagi barcha jangchilar o‘z vatanlariga, oilalariga sog‘-salomat qaytishini tilayman, lekin sizni provokatsiyalarga berilmaslikka va ig‘vogarlik qilmaslikka chaqiraman”, — deya Garibashvilining so‘zlarini keltiradi “Imedi”.
Garibashvilining so‘zlariga ko‘ra, Gruziya kontekstidagi “ikkinchi front” tushunchasining o‘zi birinchi marta ukrainalik siyosatchilar, xususan, Ukraina Milliy xavfsizlik va mudofaa kengashi kotibi Aleksey Danilov tomonidan tilga olingan.
Bundan tashqari, Garibashvili sobiq ichki ishlar vaziri Vano Merabishvili buzg‘unchi “Yagona milliy harakat” partiyasi Gruziyada hukumatni ag‘darib, ikkinchi front ochmoqchi ekanini allaqachon tan olganini aytdi. Shu bilan birga, bosh vazirning ta’kidlashicha, “radikal muxolifat bunga saylovlar orqali erishib bo‘lmasligini yaxshi biladi”.
Izoh (0)