AQSHning 44-prezidenti Barak Obama va yana 499 nafar amerikalik uchun Rossiyaga kirish taqiqlandi. Bu chora AQSHning Moskvaga qarshi sanksiyalariga javoban kiritildi, deb xabar bermoqda Rossiya Tashqi ishlar vazirligi sayti.
“(AQSh prezidenti) Jo Bayden maʼmuriyati tomonidan Rossiyaga qarshi muntazam ravishda joriy etilayotgan hamda Vashingtonning rejasiga ko‘ra, Rossiyaga maksimal darajada zarar yetkazishga, rasmiylar va mamlakatimizning oddiy fuqarolariga shaxsan ta’sir ko‘rsatishga qaratilgan sanksiyalarga javoban Rossiya Federatsiyasiga 500 nafar amerikalikning kirishi taqiqlandi”, — deyiladi TIV bayonotida.
“Stop-list”ga kiritilgan AQSH fuqarolari orasida kongressmenlar va Ukrainaga qurol yetkazib beruvchi harbiy-sanoat kompleksi kompaniyalari rahbarlari, komiklar Stiven Kolbert va Jimmi Kimmel, shuningdek, 2021-yilda Kapitoliyga bostirib kirgan olomonni ta’qib qilishda “bevosita ishtirok etgan kishilar” bor.
Avvalroq AQSH moliya vazirligi Rossiyaga qarshi sanksiyalar kengaytirilganini e’lon qilgandi. Rossiya va boshqa mamlakatlardan 200 ga yaqin kompaniya va 46 jismoniy shaxs yangi cheklovlar ostiga tushgan.
2022-yil fevralida Rossiyaning Ukrainaga keng miqyosli bosqini boshlanganidan buyon AQSH va uning 37 ta ittifoqchisi Rossiyaga nisbatan misli ko‘rilmagan sanksiyalar kiritdi. Reuters ta’kidlaganidek, cheklovlarning so‘nggi bosqichi asosan Rossiya sanoatiga qaratilgan.
Izoh (0)