AQSH asli o‘zbekistonlik erkakka qarshi sanksiya qo‘lladi

AQSH Moliya vazirligi Rossiyaga qarshi sanksiyalar ro‘yxatini kengaytirdi. Rossiya va boshqa mamlakatlardan 200 ga yaqin kompaniya va 46 jismoniy shaxsga yangi cheklovlar qo‘llandi. Ular orasida asli o‘zbekistonlik Vadim Ilmiyev Viktorovich ham bor. 

AQSH G‘aznachilik bo‘limi bergan maʼlumotga ko‘ra, Vadim Ilmiyev 1966-yil 15-avgustda Samarqand shahrida tug‘ilgan. U Ukraina fuqarosi ekani va Xerson viloyatida yashashi keltirib o‘tilgan.

U Rossiya tomonidan bosib olingan Xerson viloyatiga 2022-yil may oyida sog‘liqni saqlash boshqarmasiga yangi rahbar etib tayinlangan. Rossiya ommaviy axborot vositalari dekabr oyidan uni Xerson viloyati sog‘liqni saqlash vaziri deb tanishtirishni boshlagan.

Ochiq manbalarga ko‘ra, Ilmiyev Ukraina Kommunistik partiyasining aʼzosi bo‘lgan. 2017-yilda u Putinning cho‘qintirgan otasi Viktor Medvedchukning “Ukraina tanlovi — xalq huquqi” jamoat tashkiloti hududiy bo‘limi rahbariyatida faoliyat yuritgan.

Yillar davomida Xersonning 2,5 ming nafar davlat xizmatchilari buyurtma bo‘yicha har bir maoshidan jamg‘armaga badal to‘lagan.

Mahalliy OAV fondni shaffof bo‘lmagan hisobot uchun bir necha bor tanqid qilgan. Qizig‘i shundaki, Ilmiyevning “Bolnichnaya kassa” jamg‘armasi bilan bir kunning o‘zida Xersonning boshqa tumanida xuddi shunday nomdagi boshqa fond ro‘yxatga olingan – uning rahbari sifatida Vladimir Saldo qayd etilgan. 2004-yildan beri u “Bolnichnaya kassa” xayriya jamg‘armasini boshqarib keladi.

Ilmiyev nimaning hisobiga kun ko‘rayotgani nomaʼlum. U 2021-yil deklaratsiyada “Bolnichnaya kassa” jamg‘armasidan maosh sifatida yiliga 50 ming grivna (taxminan 1800 dollar) olishini ko‘rsatgan. 2018, 2020 va 2022-yillarda ijroiya xizmati unga Privatbank, Alfa-Bank va kredit uyushmalari oldidagi qarzlari uchun ish ochgan. Qarzdorning mol-mulki xatlangan. Ilmiyev maʼlumoti bo‘yicha harbiy xizmatchi, 1987-yilda Toshkent oliy qo‘mondonlik bilim yurtini tamomlagan.