Kovid va gripp uchun yangi vaksina, yuqumli kasalliklarni aniqlaydigan 10 mingta test, Samarqandda energetika yo‘nalishida yangi universitet. Ibrohim Abdurahmonov — Xitoy kompaniyalari bilan erishilgan kelishuvlar haqida

18—19-may kunlari prezident Shavkat Mirziyoyev Xitoy Xalq Respublikasida tashrif bilan bo‘ldi. Ushbu tashrif doirasida ikki davlat qator vazirlik va idoralari o‘rtasida kelishuvlar hamda shartnomalar imzolandi. 

Xususan, O‘zbekiston oliy taʼlim, fan va innovatsiyalar vazirligi tomonidan bir qator yo‘nalishlar bo‘yicha kelishuvlar amalga oshirildi. Vazir Ibrohim Abdurahmonov “Daryo” muxbiri bilan suhbatda mazkur kelishuvlar haqida gapirib berdi.

Ibrohim Abdurahmonovning so‘zlariga ko‘ra, xitoylik hamkorlar bilan birgalikda Sirdaryo viloyatida 500 mln dollarlik katta biotexnologik klaster tashkil qilish rejalashtirilmoqda. 

“Shuning doirasida qo‘shimcha 155 mln dollarlik dastlabki loyihalarni ishga tushirdik. Birinchisi, O‘zbekistonda har xil yuqumli kasalliklarni aniqlaydigan 10 mingta testlarni ishlab chiqarishni yo‘lga qo‘yish bo‘yicha 40 mln dollarlik loyiha. Ikkinchisi, chaqaloqlarni turli nogironlik bilan tug‘ilish holatlari kuzatilmoqda, shularni oldini olish uchun yiliga 1 mln nafar chaqaloqni tahlil qiladigan genom platformasini o‘rnatyapmiz. Bu ishlarni Toshkent, Samarqand va Sirdaryoda boshlaymiz, ushbu loyihaga iyul oyida start beramiz”, — deydi u. 

Oliy taʼlim, fan va innovatsiyalar vaziri Navoiyda substansiyalarning sintezini qiladigan loyiha qiymati 10 mln dollar bo‘lgan zavod qurilishi boshlanganini aytdi.

“Shuningdek, vaksina chiqarganimizda o‘zbek-xitoy qo‘shma vaksinasidan chiqargan edik. Buning ikkinchi fazasini boshlayapmiz. Hozir kovid ham grippga o‘xshab qoldi. Bir vaqtning o‘zida ham kovid, ham gripp uchun vaksina chiqarishni boshladik”, — deydi vazir.

Ibrohim Abdurahmonov oliy taʼlim sohasida xitoylik hamkorlar bilan birgalikda inklyuziv taʼlimni amalga oshirishni maʼlum qildi. 

“Bundan tashqari, 100 mln dollarlik Sirdaryo viloyatida yangi vaksina va diabet kasalliklariga biotexnologik dorilarni ishlab chiqaradigan katta platforma borasida kelishib oldik. Bu loyihalarning barchasini hamkorlarimiz bilan birgalikda prezidentimizga namoyish etdik. 

Hozirgi kunda Xitoy universitetlari tomonidan 41 ta grantlar taqdim etiladi. Ularning sonini ikki baravarga oshirish borasida taʼlim vazirligi bilan kelishib oldik. Shuningdek, Samarqandda energetika sohasida yangi xususiy universitet ochish bo‘yicha kelishdik. Bu yilning o‘zida 40 ta PhD va aspiranturaga mo‘ljallangan dasturlarni Samarqanddagi texnologiyalar universitetida joriy qilmoqchimiz”, — deydi u.