Surxondaryo viloyati Muzrabot tumanida 7-may kuni ichki ishlar xodimi unga qarshilik ko‘rsatgan mast erkakning qo‘llarini bog‘lab qo‘ygani to‘g‘risida xabar berilgandi. Viloyat prokuraturasiga ko‘ra, hozirda holat bo‘yicha jinoyat ishi qo‘zg‘atilgan.
Aniqlanishicha, 6-may kuni Surxondaryo viloyati Muzrabot tumani, “Shaffof” mahallasida yashovchi S.J. tuman IIBga murojaat qilib, shu kuni tumanning “Yangi hayot” mahallasida yashovchi fuqaro U.P. mast holda yashash uyiga kelib, tinchligini buzayotgani haqida bergan xabariga asosan profilaktika inspektori borgan vaqtda U.P. voqea joyidan qochib ketgan.
So‘ngra profilaktika inspektori uni topib, tuman Tibbiyot birlashmasidagi vaqtinchalik mastlik holatida bo‘lgan shaxslarga tibbiy yordam ko‘rsatish punktiga olib borib joylashtirgan.
“IIB xodimi tibbiy davolash muassasasida bemorga jismoniy kuch ishlatgani bilan bog‘liq tarqalgan videolavha yuzasidan tergovga qadar tekshiruv harakatlari yakunlandi”, — deyiladi munosabatda.
Tergovga qadar tekshiruv natijasiga ko‘ra, 19-may kuni Jinoyat kodeksining 206-moddasi (hokimiyat yoki mansab vakolati doirasidan chetga chiqish)1-qismi, 140-moddasi (haqorat qilish) 3-qismi “a” bandi bilan jinoyat ishi qo‘zg‘atilgan.
Jinoyat ishi bo‘yicha dastlabki tergov harakatlari Muzrabot tumani prokuraturasi tomonidan olib borilmoqda. Tergov harakatlarining borishi viloyat prokuraturasi tomonidan nazoratga olingan.
Surxondaryo viloyati IIB bergan ma’lumotlarga ko‘ra, fuqaro U.P. tibbiyot birlashmasida davolanayotgan bemorlarning tinchligini buzib, qonuniy talablarga bo‘ysunmasdan, qo‘pol so‘zlar bilan haqoratlashda davom etgani sabab uni tinchlantirish maqsadida IIB xodimi qat’iy harakat qilib, qo‘llarini bog‘lab qo‘ygan.
Izoh (0)