Toshkent viloyati IIBB Tezkor qidiruv xizmati xodimlari tomonidan viloyat hududida ikkita transport vositasini olib qochgan shaxs qo‘lga olindi. Bu haqda idora matbuot xizmati xabar berdi.
Qayd etilishicha, 10-may kuni soat 20:20 larda Toshkent viloyati IIBB 102 xizmatiga “VAZ-21013” rusumli avtoulovini eshiklarini yopmasdan, kalitini ham o‘zida qoldirgan fuqaro qaytib chiqqanida, avtomobili joyida yo‘qligini ma’lum qilgan.
Xuddi shunday holat 12-may kuni Quyi Chirchiq tumanida ham sodir bo‘lgan. “Sergeli” mahallasi hududida joylashgan dala maydonida fuqaro o‘ziga tegishli bo‘lgan Nexia avtomashinasini noma’lum tomonga olib qochib ketilganini ma’lum qilgan. Bu ikki holat o‘rtasida o‘zaro bog‘liqlik mavjudligi bo‘yicha dastlabki xulosalar olinib, tezkor qidiruv tadbirlari jadallashtirilgan.
Quyi Chirchiq tuman Ichki ishlar bo‘limi tezkor xodimlari tomonidan o‘tkazilgan tadbirlar davomida Nexia avtomashinasini Toshkent shahrida tug‘ilgan, Parkent tumanida ro‘yxatga olingan, fuqaroligi bo‘lmagan 32 yoshli shaxs olib qochgani aniqlanib, u daliliy ashyolar bilan ushlangan.
Olib borilgan surishtiruv ishlari davomida, ushbu shaxs joriy yilning 10-may kuni Nurafshon shahrida “VAZ-21013” rusumli avtomashinani ham olib qochib ketgani ma’lum bo‘lgan.
Hozirda gumonlanuvchining boshqa jinoyatlarga aloqadorligini tekshirish maqsadida qo‘shimcha surishtiruv ishlari olib borilmoqda.
May boshlarida Qoraqalpog‘istonning Nukus shahrida olib qochilgan Trailblazer ag‘darilgan holda topilgandi. Aprel o‘rtalarida esa Toshkent viloyati Yuqori Chirchiq tumanida o‘zganing mashinasini olib qochgan 18 yoshli yigit ushlangani to‘g‘risida xabar berilgandi.
Izoh (0)