Xorazm viloyati IIB ijtimoiy tarmoqlarda tarqalgan, hazorasplik fuqarolar va YPX xodimlarini haqorat qilgan erkak videosi yuzasidan ma’lumot berdi.
Ijtimoiy tarmoqlarda 17-may kuni bir fuqaroning Hazorasp tumanida yashovchi fuqarolar va YPX inspektorlarini haqorat qilgani tasvirlangan videolavha tarqaldi. Xorazm viloyati IIB tomonidan olib borilgan surishtiruv ishlari natijasida ushbu fuqaroning shaxsiga aniqlik kiritilgan.
“Yurtdoshlarimizning haqli eʼtiroziga sabab bo‘lgan ushbu shaxsning xatti-harakatlari yuzasidan tergovga qadar tekshiruv olib borilmoqda”, — deyiladi munosabatda.
Ko‘p o‘tmay ijtimoiy tarmoqlarda ushbu shaxsning uzr so‘rab chiqqan videosi ham tarqaldi.
“Xorazmga aylanishga borgan vaqtida hazoraspliklarni, shuningdek, mast holatda YPX xodimlarini haqorat qilganim uchun uzr so‘rayman”, — deydi u.
YPX xodimlari bilan bog‘liq janjallar
Bundan oldin Farg‘onada jamoat tartibini buzib, IIB xodimlarini haqorat qilgan mast fuqaro 15 sutkaga qamalgandi. Navoiyda YPX xodimlarini urib, haqoratlagan “himoyachi” ayolga jazo tayinlangani, Toshkentda YPX xodimlari va fuqarolar o‘rtasida janjal sodir bo‘lgani, Surxondaryoda haydovchi YPX inspektorini urib, tan jarohati yetkazgani to‘g‘risida xabar berilgandi.
Izoh (0)