18—19 май кунлари президент Шавкат Мирзиёев Хитой Халқ Республикасида ташриф билан бўлди. Ушбу ташриф доирасида икки давлат қатор вазирлик ва идоралари ўртасида келишувлар ҳамда шартномалар имзоланди.
Хусусан, Ўзбекистон олий таълим, фан ва инновациялар вазирлиги томонидан бир қатор йўналишлар бўйича келишувлар амалга оширилди. Вазир Иброҳим Абдураҳмонов “Дарё” мухбири билан суҳбатда мазкур келишувлар ҳақида гапириб берди.
Иброҳим Абдураҳмоновнинг сўзларига кўра, хитойлик ҳамкорлар билан биргаликда Сирдарё вилоятида 500 млн долларлик катта биотехнологик кластер ташкил қилиш режалаштирилмоқда.
“Шунинг доирасида қўшимча 155 млн долларлик дастлабки лойиҳаларни ишга туширдик. Биринчиси, Ўзбекистонда ҳар хил юқумли касалликларни аниқлайдиган 10 мингта тестларни ишлаб чиқаришни йўлга қўйиш бўйича 40 млн долларлик лойиҳа. Иккинчиси, чақалоқларни турли ногиронлик билан туғилиш ҳолатлари кузатилмоқда, шуларни олдини олиш учун йилига 1 млн нафар чақалоқни таҳлил қиладиган геном платформасини ўрнатяпмиз. Бу ишларни Тошкент, Самарқанд ва Сирдарёда бошлаймиз, ушбу лойиҳага июль ойида старт берамиз”, — дейди у.
Олий таълим, фан ва инновациялар вазири Навоийда субстанцияларнинг синтезини қиладиган лойиҳа қиймати 10 млн доллар бўлган завод қурилиши бошланганини айтди.
“Шунингдек, вакцина чиқарганимизда ўзбек-хитой қўшма вакцинасидан чиқарган эдик. Бунинг иккинчи фазасини бошлаяпмиз. Ҳозир ковид ҳам гриппга ўхшаб қолди. Бир вақтнинг ўзида ҳам ковид, ҳам грипп учун вакцина чиқаришни бошладик”, — дейди вазир.
Иброҳим Абдураҳмонов олий таълим соҳасида хитойлик ҳамкорлар билан биргаликда инклюзив таълимни амалга оширишни маълум қилди.
“Бундан ташқари, 100 млн долларлик Сирдарё вилоятида янги вакцина ва диабет касалликларига биотехнологик дориларни ишлаб чиқарадиган катта платформа борасида келишиб олдик. Бу лойиҳаларнинг барчасини ҳамкорларимиз билан биргаликда президентимизга намойиш этдик.
Ҳозирги кунда Хитой университетлари томонидан 41 та грантлар тақдим этилади. Уларнинг сонини икки бараварга ошириш борасида таълим вазирлиги билан келишиб олдик. Шунингдек, Самарқандда энергетика соҳасида янги хусусий университет очиш бўйича келишдик. Бу йилнинг ўзида 40 та PhD ва аспирантурага мўлжалланган дастурларни Самарқанддаги технологиялар университетида жорий қилмоқчимиз”, — дейди у.
Изоҳ (0)