Sirdaryo viloyatida YPX xodimiga 100 dollar va 200 ming so‘m pora berishga uringan qoidabuzar haydovchi qo‘lga olindi. Bu haqda “Bu kun” informatsion dasturida ma’lum qilindi.
Qayd etilishicha, Surxondaryo viloyatida yashovchi fuqaro Sirdaryo viloyati Oqoltin tumanida harakatlanib ketayotgan vaqtida yo‘l harakati xavfsizligi xodimlari tomonidan to‘xtatilgan. Mashinani ko‘zdan kechirish vaqtida uning oynalari tusi ruxsatsiz qoraytirilgani aniqlangan va Ma’muriy javobgarlik to‘g‘risidagi kodeksning 126-moddasi (ko‘zgusimon va (yoki) tusi o‘zgartirilgan (qoraytirilgan) oynali, shuningdek tevarak-atrofni ko‘rishni cheklaydigan qoplamali transport vositalaridan foydalanish) bo‘yicha bayonnoma rasmiylashtirilgan, transport vositasi esa jarima maydoniga qo‘yilgan.
Shundan keyin mazkur fuqaro qonuniy jazodan qutulib qolish maqsadida YPX inspektoriga 100 dollar va 200 ming so‘m pulni berayotganida qo‘lga olingan.
Jinoyat ishlari bo‘yicha Guliston shahar sudida ko‘rilgan mazkur ishda ayblanuvchiga nisbatan qamoq bilan bog‘liq bo‘lmagan 3 yil muddatga ozodlikdan cheklash jazosi tayinlandi.
YPX xodimlariga pora berish holatlari
Buxoroda mast holda mashina boshqargan haydovchi YPX inspektoriga 100 dollar pora berishga uringani to‘g‘risida xabar berilgandi. Shuningdek, Boysun tumanida YPX inspektoriga pora berishga uringan qoidabuzar haydovchiga nisbatan jinoyat ishi qo‘zg‘atilgan edi. Aprel oyida bo‘lsa Surxondaryoda YPX inspektori 800 dollar pora olayotganida qo‘lga tushgandi.
Izoh (0)