Futbol bo‘yicha Chempionlar Ligasi yarim final javob o‘yinida “Manchester Siti” va “Real” jamoalari 17-may, chorshanba kuni o‘zaro to‘qnash keladi. Qarama-qarshilik g‘olibi 10-iyun kuni Istanbuldagi finalda “Inter” bilan o‘ynaydi.
Yarim finalning dastlabki bahsi “Santyago Bernabeu”da bo‘lib o‘tgan va unda 1:1 hisobi qayd etilgan. Madridliklar safida Vinisius Junior gol urgan bo‘lsa, “shaharliklar”ning goliga Kevin de Bryuyne muallif bo‘lgan.
Jamoalar holati
APLning so‘nggi turida “Everton” ustidan qozonilgan g‘alabadan so‘ng “Manchester Siti” trebl sari yana bir qadam tashladi. “Arsenal” shu turda “Brayton”ga imkoniyatni boy berib qo‘ydi va endi Pep Gvardiola jamoasi qolgan 3 ta turdan faqat bittasida g‘alaba qozonsa, Angliya chempioniga aylanadi. Angliya Kubogi finalida “Manchester Yunayted”ga qarshi bahs olib boradi. Chempionlar Ligasi yarim final javob o‘yini esa “shaharliklar” uchun yangi tarix yozishga ajoyib imkoniyat.
“Real” esa ligada “Xetafe”ni Asensioning goli evaziga mag‘lub etdi. Shu turning o‘zida prinsipial raqibi “Barselona” Ispaniya chempionligini nishonladi. Madrid klubida trebl qilish uchun imkoniyat endi yo‘q. Lekin ular uchun “o‘ziniki” bo‘lib qolgan “shalpangquloq”ni qo‘lga kiritish asosiy vazifalardan biri bo‘lib qolaveradi.
Jamoalarning so‘nggi o‘yinlari
“Manchester Siti”
- 14.05. “Everton” 3:0 (APL)
- 09.05 “Real” 1:1 (YCHL)
- 06.05. “Lids” 2:1 (APL)
- 03.05. “Vest Hem” 3:0 (APL)
- 30.04. “Fulhem” 2:1 (APL)
“Real”
- 13.05. “Xetafe” 1:0 (La Liga)
- 09.05. “Manchester Siti” 1:1 (YCHL)
- 06.05. “Osasuna” 2:1 (Ispaniya Kubogi)
- 02.05. “Real Sosyedad” 0:2 (La Liga)
- 29.04. “Almeriya” 4:2 (La Liga)
Statistika
- “Manchester Siti” Chempionlar Ligasi doirasida uy o‘yinlarida 25 bahsdan buyon mag‘lub bo‘lmayapti (23 ta g‘alaba va 2 ta durang). So‘nggi bor 2018-yil sentabr oyida “Lion” “Etihad”da g‘alaba qozonishga muvaffaq bo‘lgan.
- “Real” “Manchester Siti” maydonida 4 o‘yindan buyon g‘alaba qozona olmayapti (2 ta durang va 2 ta mag‘lubiyat).
- “Manchester Siti” fevral oyidan buyon barcha musobaqalarda mag‘lubiyatga uchramayapti (18 ta g‘alaba va 4 ta durang).
- “Manchester Siti” 2023-yil o‘z maydonidagi barcha 15 ta o‘yinda g‘alaba qozongan. To‘plar nisbati — 52:7.
- “Real” YCHLdagi so‘nggi 7 ta pley-off o‘yinlarida mag‘lub bo‘lmayapti (6 ta g‘alaba va bitta durang).
- “Manchester Siti” so‘nggi yetti yil ichida “Real”ga ikki marta YCHL yarim finalini boy bergan.
- “Real” mehmondagi so‘nggi 6 o‘yinning uchtasida mag‘lubiyatga uchradi: “Barselona” (1:2), “Jirona” (2:4) va “Real Sosyedad” (0:2).
- “Manchester Siti” Chempionlar Ligasining 2022/23-yilgi mavsumidagi barcha uy uchrashuvlarida g‘alaba qozondi. To‘plar nisbati — 20:2.
Murabbiylarning o‘yin oldidan fikrlari
Karlo Anchelotti (“Real”)
Vazifa har doimgidek, jamoa bilan maksimal natijalarga erishish. Menda ajoyib reja bor, agar yutqazadigan bo‘lsak, men tarkib tanlashda adashgan bo‘laman.
“Real”ning YCHLdagi muvaffaqiyat siri? Buni tushuntirish qiyin. Dastlabki 5 ta sovrindan keyin bu musobaqa “Real” uchun doim muhim ahamiyat kasb etgan. Klub di Stefano, Xento va Amansiolarning tarixini saqlab qolishi kerak.
Pep Gvardiola (“Manchester Siti”)
Hujumda yaxshiroq harakat qilishimiz uchun ba’zi bir o‘zgarishlarni amalga oshiraman. Xavotirga hojat yo‘q, bu o‘zgarishlar avvalgilaridan unchalik farq qilmaydi.
Barchasini o‘zingiz ko‘rib olasiz. Boshqa narsalarni gapira olmayman, chunki Karlo Anchelotti buni eshitib qolishi mumkin.
“Manchester Siti” va “Real” o‘rtasidagi bahs O‘zbekiston vaqti bilan 17-maydan 18-mayga o‘tar kechasi 00:00 da start oladi.
Izoh (0)