Chempionlar Ligasida Milan klublari to‘qnashuvi. “Inter” va “Milan” final yo‘llanmasi uchun jang qiladi

Futbol bo‘yicha Chempionlar Ligasi yarim final javob o‘yinida “Inter” va “Milan” jamoalari 16-may, seshanba kuni o‘zaro to‘qnash keladi. 

Dastlabki uchrashuvda “nerazzuri” 2:0 hisobida g‘alaba qozongan. Uchrashuvning 8-daqiqasida Edin Jeko, 11-daqiqasida Genrix Mxitaryan o‘z hisobiga gol yozdirib qo‘ygandi. 

Jamoalar holati

“Milan” muvaffaqiyatsizlikka yaqin. Klub A Seriyaning so‘nggi 11 turidan 8 tasida g‘alaba qozona olmadi. 13-may kuni xavfli zonada turgan “Spetsiya”ga (0:2) mag‘lub bo‘ldi. Amaldagi Italiya chempioni 2022/23-yilgi mavsum kuchli to‘rtlikka ham kirishi shubha ostida qolmoqda. Yozda jamoa islohotlarni amalga oshirishi kutilmoqda, hatto, Paolo Maldini ham o‘z postini tark etishi mumkin.

Aprel oyi o‘rtalarida “Inter” tushkun kayfiyatda edi. Liganing so‘nggi 5 turida faqat bir ochko jamg‘ara olgan. Bosh murabbiy Simone Inzagi sha’niga tanqidlar yog‘ilardi. Chempionlar Ligasi chorak finalidagi muvaffaqiyatsizlik uning iste’fosiga sabab bo‘lardi. Biroq “Benfika” musobaqadan chiqarib yuborildi. Shundan keyin “nerazzuri”ni to‘xtatib bo‘lmay qoldi. Barcha musobaqalardagi ketma-ket yettita g‘alaba va 21:3 to‘plar nisbati. A Seriyada uchinchi o‘ringa qadar ko‘tarildi.

Jamoalarning so‘nggi o‘yinlari

“Inter”

• 30.04.2023. “Inter” — “Latsio” 3:1 (A Seriya)
• 03.05.2023. “Verona” — “Inter” 0:6 (A Seriya)
• 06.05.2023. “Roma” — “Inter” 0:2 (A Seriya)
• 10.05.2023. “Milan” — “Inter” 0:2 (Chempionlar Ligasi)
• 13.05.2023. “Inter” — “Sassuolo” 4:2 (A Seriya)

“Milan”

• 29.04.2023. “Roma” — “Milan” 1:1 (A Seriya)
• 03.05.2023. “Milan” — “Kremoneze” 1:1 (A Seriya)
• 06.05.2023. “Milan” — “Latsio” 2:0 (A Seriya)
• 10.05.2023. “Milan” — “Inter” 0:2 (Chempionlar Ligasi)
• 13.05.2023. “Spetsiya” — “Milan” 2:0 (A Seriya).

Statistika

• “Milan” “Inter”ga qarshi so‘nggi 9 ta o‘yinning 8 tasida birinchi bo‘lib gol o‘tkazib yubormoqda. 8 ta o‘yinning 3 tasida “rossoneri” mag‘lubiyatga uchramagan — ikkita g‘alaba va bitta durang. Qolgan 5 ta o‘yinda gol ura olmasdan mag‘lub bo‘ldi. 
• Kubok bahslaridagi o‘zaro o‘yinlarda ustunlik “Milan” tomonda — 13:11. Kubok pley-offlarida keyingi bosqichga chiqish bo‘yicha ham “rossoneri” oldinda — 8:5. 
• “Inter” joriy mavsum “Milan” ustidan barcha musobaqalarda 3 marta g‘alaba qozondi. “Nerazzuri” 1994/95-yilgi mavsumdan buyon ilk bor bu vazifani uddaladi. 
• “Inter” 2022/23-yilgi mavsum Chempionlar Ligasi pley-off bahslarida mag‘lubiyatga uchramadi. 5 ta o‘yinning 4 tasini “quruq” o‘tkazdi. Italiya jamoalari ichida faqatgina “Yuventus” 1/8, 1/4 va 1/2 finallarda mag‘lubiyatga uchramasdan finalga qadar yetib borgan. 
• Simone Inzagi “Inter” boshqaruvida Kubokdagi qarama-qarshiliklarning 12 tasidan faqat bittasida mag‘lub bo‘lgan (2021/22-yilgi mavsum YCHL 1/8 finalida “Liverpul”ga). Italiya Kubogining 7 ta o‘yinidan barchasida g‘alaba qozongan, 2 marta Italiya Superkubogida zafar quchgan, shuningdek, joriy mavsum Chempionlar Ligasida 2 ta raqibni dog‘da qoldirdi.
• “Milan” YCHL pley-offlarining so‘nggi 16 tasidan faqat bittasida — 2007-yil “Bavariya”ga qarshi o‘yinda g‘alaba qozongan (8 ta durang, 7 ta mag‘lubiyat).
• “Milan” Yevrokuboklar tarixida bir marta dastlabki uchrashuvdagi ikki yoki undan ko‘p gol farqini yo‘qqa chiqara olgan. “Rossoneri” 1985/86-yilgi mavsum UEFA Kubogida Fransiyaning “Oser” klubiga 1:3 hisobida mag‘lub bo‘lgan. Javob o‘yinida esa 3:0 hisobida zafar quchgan.

Murabbiylarning o‘yin oldidan fikrlari

Simone Inzagi (“Inter”)

“Inter” hisobni saqlab qolish uchun himoyaga yotib olmaydi. Ha, o‘yinning ba’zi vaqtlarida himoyalanishga majburmiz. Lekin butun o‘yin davomida emas. 

Do‘stlarim o‘yin hakami fransuz ekani (Kleman Tyurpen) va raqib jamoa safida 4 nafar fransuz to‘p surishiga ishora qildi. Biroq bu bizga muammo emas.

Stefano Pioli (“Milan”)

Birinchi o‘yindan farqli ravishda maydonda yaxshiroq harakat qilib, g‘alabaga intilmoqchimiz. Bunday o‘yinlarga tayyorgarlik ko‘rish oson emas, lekin maqsadimiz sari harakat qilamiz.

Standart vaziyatlarda ehtiyotkorroq bo‘lishimiz lozim, bu raqibning ustun tomoni. Undan tashqari o‘zimiz ham imkoniyatlardan foydalanib qolishimiz kerak. Birinchi o‘yinda xato qildik, endi bunga haqqimiz yo‘q.

“Inter” va “Milan” o‘rtasidagi bahs O‘zbekiston vaqti bilan 16-maydan 17-mayga o‘tar kechasi 00:00 da start oladi.