Бухоро вилоятида диний экстремистик оқим тарғиботи билан шуғулланиб келган шахсга нисбатан жиноят иши қўзғатилди, деб хабар беради ЎзА.
Маълум қилинишича, Ғиждувон туманида яшовчи 34 ёшли Б.Ж. 2015—2021 йилларда Москва шаҳридаги олий таълим муассасасида ўқиши даврида ижтимоий тармоқлар орқали “Салафийлар” ДЕО таъсирига тушиб, Telegram мессенжерида иккита гуруҳ очган ва ушбу диний экстремистик оқим ғояларини тарғиб қилиш билан шуғулланган.
Шунингдек, Ўзбекистонга қайтиб келганидан кейин ҳам у ўзининг ноқонуний ҳаракатларини давом эттириб, экстремистик ғояларни яқин қариндошларига тарғиб қилган.
Давлат хавфсизлик хизмати ходимлари томонидан олиб борилган тезкор-қидирув тадбирлари натижасида ушбу шахснинг ноқонуний фаолиятига чек қўйилган.
Дин ишлари бўйича қўмита хулосасига кўра, унинг мобил телефон аппарати хотирасида ақидапарастлик ғоялари билан йўғрилган материаллар мавжуд бўлиб, улар Ўзбекистон ҳудудига олиб кириш, тайёрлаш ва тарқатиш тақиқланган материаллар сирасига киради.
Ҳозирда Б.Ж.га нисбатан Жиноят кодексининг 244-1-моддаси (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 3-қисми “г” банди билан жиноят иши қўзғатилиб, тергов ҳаракатлари олиб борилмоқда.
Бир неча кун олдин Тошкент давлат иқтисодиёт университети талабаси, 21 ёшли Жаҳонгир Улуғмуродов Telegram гуруҳда диний мазмундаги нашида тарқатгани учун 3 йилга озодликдан маҳрум қилиш жазоси тайинлангани ҳақида хабар берилган эди. Мазкур ҳолат кенг жамоатчилик томонидан эътирозларга сабаб бўлди.
Хусусан, фаоллар талабанинг ёшлиги, дўстларига юборган нашиданинг маъносини тушунмай шу ишни қилгани ва берилган жазо ўта оғирлигини қайд этган. Тошкент вилояти ИИББ ахборот хизмати ижтимоий тармоқларда айрим электрон оммавий ахборот воситалари ва виртуал макон фойдаланувчилари орасида “танишларига оддий диний қўшиқ — нашида тарқатган талаба қамалди” мазмунидаги нохолис маълумотлар тарқалаётгани юзасидан муносабат билдирганди.
Изоҳ (0)