Farg‘ona viloyati Bag‘dod tumanida ijtimoiy tarmoq orqali diniy mazmundagi maʼruzalarni tarqatib kelgan shaxs jarimaga tortildi. Bu haqda viloyat Ichki ishlar boshqarmasi axborot xizmati xabar berdi.
Xabarga ko‘ra, holat 4-yanvar kuni, Ichki ishlar boshqarmasi TQX TQKB xodimlari tomonidan o‘tkazilgan tezkor tadbir davomida aniqlangan. Tumanning Qizilbog‘ mahallasida yashovchi fuqaro M.R.ga tegishli telefon ko‘zdan kechirilganda, Instagram ijtimoiy tarmog‘ida profil ochib, ushbu profil orqali diniy mazmundagi audio va video maʼruzalarni tarqatib kelayotgan maʼlum bo‘lgan.
Mazkur holat yuzasidan Bag‘dod tumani IIB tomonidan Maʼmuriy javobgarlik to‘g‘risidagi kodeksning 184-moddasi prim 2-moddasi bilan hujjatlar rasmiylashtirilib, jinoyat ishlari bo‘yicha Bag‘dod tumani sudiga yuborilgan. Sud M.R.ni huquqbuzar deb topib, unga yuqoridagi moddaga asosan 900 000 so‘m miqdorda jarima jazosi tayinladi.
Avvalroq Toshkent davlat iqtisodiyot universiteti talabasi, 21 yoshli Jahongir Ulug‘murodov Telegram guruhda diniy mazmundagi nashida tarqatgani uchun 3 yilga ozodlikdan mahrum qilish jazosi tayinlangani haqida xabar berilgan edi. Mazkur holat keng jamoatchilik tomonidan e’tirozlarga sabab bo‘ldi.
Xususan, faollar talabaning yoshligi, do‘stlariga yuborgan nashidaning maʼnosini tushunmay shu ishni qilgani va berilgan jazo o‘ta og‘irligini qayd etgan. Toshkent viloyati IIBB axborot xizmati ijtimoiy tarmoqlarda ayrim elektron ommaviy axborot vositalari va virtual makon foydalanuvchilari orasida “tanishlariga oddiy diniy qo‘shiq — nashida tarqatgan talaba qamaldi” mazmunidagi noxolis maʼlumotlar tarqalayotgani yuzasidan munosabat bildirgandi.
Izoh (0)