Farg‘onada xalqaro kulollar forumi va milliy kulolchilik mahsulotlari ko‘rgazmasi o‘tkazilmoqda

Rishton tumanida an’anaviy Turkiy xalqlar hunarmandchiligi forumi va milliy kulolchilik mahsulotlari ko‘rgazma-savdosi o‘z ishini boshladi. Bu haqda “Daryo” muxbiri Azizjon Ermatov xabar bermoqda.

Xalqaro hunarmandchilik markazida o‘tkazilayotgan forumda Markaziy Osiyo respublikalari, Turkiya, Ozarbayjon, Fransiya, Isroil, Chexiya kabi davlatlardan kelgan mohir usta kulollar, taniqli madaniyat arboblari, san’atshunos olimlar ishtirok etmoqda.

Forumning maqsadi jahon iqtisodiyotida muhim tarmoq hisoblangan hunarmandchilikni keng targ‘ib qilish, hunarmandchilikning asosiy yo‘nalishlaridan biri bo‘lgan kulolchilik an’analari va maktablarini saqlash, sohadagi ilmiy izlanishlar ko‘lamini kengaytirish, o‘zaro tajriba almashish, yangi ish o‘rinlarini yaratish va iqtidorli hunarmandlarni rag‘batlantirishdan iboratdir.

Forum doirasida “Rishton kulolchiligi: Kecha, bugun, ertaga” ilmiy-amaliy konferensiyasi, “Kulolchilik maxsulotlarini ishlab chiqarish va eksport qilishda yutuq va muammolar”  davra suhbati, “An’anaviy Rishton kulolchiligi” kitobi taqdimoti, kulolchilik mahsulotlari ko‘rik-tanlovi, xorijiy va mahalliy ustalarning mahorat darslari, xalq sayillari, konsert dasturlari, ko‘rgazmalar, kulolchilikka oid badiiy va hujjatli filmlar namoyishi, ustaxonalarga ekskursiyalar o‘tkaziladi.

Shuningdek, Rishtondagi Burhoniddin al-Marg‘iloniy ar-Roshidoniy nomli istirohat bog‘ida “Kulollar sayli” milliy kulolchilik mahsulotlari ko‘rgazma-savdosi tashkil etilgan.

Ko‘rgazma-savdoga viloyatlar va Qoraqalpog‘iston kulolchilik maktablarining vakillari bo‘lgan usta kulollarning eng sara asarlari qo‘yilgan.