O‘zbekistonda 1-maydan pedagog xodimlarning oylik maoshlari oshirilgani ma’lum qilindi.
Xabarga ko‘ra, 1-maydan maktabgacha va maktab taʼlimi, madaniyat va sport muassasalari pedagog va rahbar xodimlarining bazaviy tarif stavkalari hamda tuman (shahar) maktabgacha va maktab taʼlimi bo‘limlari xodimlarining lavozim maoshlari miqdorlarini tasdiqlash to‘g‘risidagi qaror kuchga kirdi.
2021-yil sentabrda Shavkat Mirziyoyev farg‘onalik saylovchilar bilan uchrashuv chog‘ida o‘qituvchilar maoshini 1 000 dollarga yetkazmaguncha to‘xtamasligini ma’lum qilgan edi. 2020-yilning noyabrida o‘qituvchi va shifokorlar bilan uchrashuvda Prezident ularning maoshini oshirish bo‘yicha katta rejalar haqida e’lon qilgandi.
“O‘qituvchi 1 000 dollar olmasa, ishga kelmasligi kerak. Xuddi shu holat shifokor bilan. Agar shifokor 1 000 dollar olmasa, ertaga bolalari va nevaralarini qanday boqadi?” — degan edi prezident. O‘shanda Shavkat Mirziyoyev ko‘pchilik mamlakatdagi tibbiy xizmatlar sifatidan norozi ekanini tanqid qilgandi.
O‘zbekistonda pedagog xodim maqomini belgilashga oid qonun loyihasi ishlab chiqilgan edi. Mazkur qonun loyihasi manfaatdor vazirlik va idoralar, taʼlim tashkilotlarida faoliyat yuritib kelayotgan pedagog xodimlarning taklif va istaklari, shuningdek, jamoatchilik muhokamasi doirasida kelib tushgan takliflar asosida qayta ishlanib, Vazirlar Mahkamasiga kiritilgan. Qonun loyihasida pedagog xodimlarning huquq va majburiyatlari, ularni ijtimoiy himoya qilish hamda ularning huquqlari, shaʼni, qadr-qimmati va ishchanlik obro‘si davlat himoyasi ostida bo‘lishi to‘g‘risidagi normalar belgilanmoqda.
Shuningdek, professional ta’lim muassasalarida faoliyat yuritayotgan o‘qituvchilar maoshi o‘rtacha 20 foizga oshirilib, yuqori natijalarga erishganlarga 50 foizgacha ustama to‘lash tizimi joriy etilishi kutilmoqda.
Izoh (0)