Bugun Qonunchilik palatasi deputatlari tomonidan “Pedagog maqomi to‘g‘risida”gi qonun loyihasi muhokamasi bo‘lib o‘tadi. Bu haqda Maktabgacha va maktab ta’limi vazirligi xabar berdi.
Qayd etilishicha, mazkur qonun loyihasi manfaatdor vazirlik va idoralar, taʼlim tashkilotlarida faoliyat yuritib kelayotgan pedagog xodimlarning taklif va istaklari, shuningdek, jamoatchilik muhokamasi doirasida kelib tushgan takliflar asosida qayta ishlanib, Vazirlar Mahkamasiga kiritilgan.
Loyiha Vazirlar Mahkamasi Rayosati qaroriga muvofiq Oliy Majlisi Qonunchilik palatasiga taqdim qilingan bo‘lib, 2023-yilning 2-may kuni Qonunchilik palatasi deputatlari tomonidan qonun loyihasi muhokamasi bo‘lib o‘tishi hamda birinchi o‘qishda qabul qilinishi kutilmoqda.
Mazkur qonun loyihasida pedagog xodimlarning huquq va majburiyatlari, ularni ijtimoiy himoya qilish hamda ularning huquqlari, shaʼni, qadr-qimmati va ishchanlik obro‘si davlat himoyasi ostida bo‘lishi to‘g‘risidagi normalar belgilanmoqda.
Oliy majlis qonunchilik palatasining navbatdagi majlisi soat 15:00 da Qonunchilik palatasining rasmiy veb-sayti, YouTube’dagi kanali orqali to‘g‘ridan to‘g‘ri efirga uzatiladi.
Shavkat Mirziyoyev 27-mart kuni pedagog xodimlarning xizmat vazifalarini bajarishiga to‘sqinlik qilganlik uchun javobgarlikni kuchaytirishni ko‘zda tutuvchi qonunni imzolagan edi. Unga ko‘ra, pedagog xodimni mehnatga biron-bir shaklda maʼmuriy tarzda majburlash uchun maʼmuriy va jinoiy javobgarliklar kuchaytirilmoqda. Jumladan, umumiy holatda biror shaxsni majburiy mehnatga jalb etish 30 million so‘mgacha (100 baravar) jarimaga sabab bo‘lsa, endilikda pedagoglarni majburiy mehnatga jalb qilish 45 million so‘mgacha (150 baravar) jarima bilan jazolanishi mumkin.
Izoh (0)