Oliy Majlis Qonunchilik palatasidagi “Milliy tiklanish” demokratik partiyasi fraksiyasining yig‘ilishida 2022—2026-yillarga mo‘ljallangan Yangi O‘zbekiston taraqqiyot strategiyasini “Insonga eʼtibor va sifatli taʼlim yili”da amalga oshirishga oid Davlat dasturining 2023-yil birinchi choragi yakunlari yuzasidan Vazirlar Mahkamasining hisoboti eshitildi.
Yig‘ilishda qayd etilishicha, professional taʼlim sohasi xodimlari mehnatiga haq to‘lashning yangi tizimini joriy etish maqsadida prezidentning “Professional taʼlim muassasalari xodimlari mehnatiga haq to‘lashning takomillashtirilgan tizimini joriy etish va ularni moddiy rag‘batlantirishni kuchaytirish to‘g‘risida”gi qarori loyihasi ishlab chiqilgan.
Ushbu hujjat professional taʼlim muassasalarida faoliyat yuritayotgan o‘qituvchilarning lavozim maoshlarini o‘rtacha 20 foizga oshirishga, fidoyi, tashabbuskor hamda yuqori natijalarga erishgan pedagoglarning bazaviy tarif stavkalariga har oylik 50 foizgacha ustama to‘lash tizimi joriy etilishiga xizmat qiladi.
Yig‘ilishda, shuningdek, deputatlar aholiga axborot-kutubxona xizmati ko‘rsatish, kitobxonlikni keng ommalashtirish hamda “Kitobsevar millat” umummilliy g‘oyasini ro‘yobga chiqarish maqsadida amalga oshirilgan ishlarni ijobiy baholagan. Qizg‘in muhokamalardan so‘ng, deputatlar Vazirlar Mahkamasining hisobotini maʼqullagan.
2021-yil sentabrda Shavkat Mirziyoyev farg‘onalik saylovchilar bilan uchrashuv chog‘ida o‘qituvchilar maoshini 1 000 dollarga yetkazmaguncha to‘xtamasligini ma’lum qilgan edi. 2020-yilning noyabrida o‘qituvchi va shifokorlar bilan uchrashuvda Prezident ularning maoshini oshirish bo‘yicha katta rejalar haqida e’lon qilgandi.
“O‘qituvchi 1 000 dollar olmasa, ishga kelmasligi kerak. Xuddi shu holat shifokor bilan. Agar shifokor 1 000 dollar olmasa, ertaga bolalari va nevaralarini qanday boqadi?” — degan edi prezident. O‘shanda Shavkat Mirziyoyev ko‘pchilik mamlakatdagi tibbiy xizmatlar sifatidan norozi ekanini tanqid qilgandi.
Izoh (0)