“Shifokor 1000 dollar olmasa, u qanday qilib bolalari, nabiralarini boqadi?” — Shavkat Mirziyoyev
O‘zbekiston Prezidenti Shavkat Mirziyoyev 20-noyabr kuni Toshkentda tibbiyot xodimlari va pedagoglar bilan uchrashgani to‘g‘risida xabar berilgandi. Uchrashuvda mamlakat rahbari fuqarolar ta’lim va sog‘liqni saqlash tizimidan norozi ekanligini alohida ta’kidlab o‘tgan. Shuningdek, Prezident maktab direktorlari va poliklinika rahbalarining ishlash usullaridan norozi ekanligini bildirgan, deb yozadi “Gazeta.uz”.
“Toshkentda tibbiyot sohasida akademiya, ilm maskani bormi? Bor. Ikkinchidan, Toshkentda 60ga yaqin respublika tibbiy muassasalari bormi? Bor. Yaxshimi-yomonmi, 150ta poliklinika, turli yo‘nalishlar bo‘yicha shifoxonalar bormi? Bor. Oxirgi 3,5 yil sizlar bilan birga ishlayapmiz, shu yillarda odamlar tibbiyot sohasida nimadandir rozi bo‘la oldimi, yo‘qmi? Ikkinchidan, akademiyaning, respublika muassasalarining kuch-qudratidan, imkoniyatidan amalda foydalanilyaptimi? Sirdaryoga, Namanganga yoki Toshkent viloyatiga nisbatan odamlarni rozi qilyapmizmi, yo‘qmi? Mening o‘ylashimcha, savolga ijobiy javob yo‘q. O‘zgaramizmi, yo‘qmi? O‘zgarsak, qanday o‘zgaramiz? Tik turib, belimizni mahkam bog‘lab poytaxtdagi 3 million xalqni rozi qila olamizmi, yo‘qmi, degan savol meni qiynaydi”, — deydi Prezident.
“Qaror chiqdi, vazirni almashtirdik, boshqarmaga o‘zim ishongan insonni boshliq qilib tayinladik, tizimni o‘zgartiryapmiz. Toshkentda qachon natija bo‘ladi? Endi sizlar — ijrosizlar. Qasamyod qilgansizlar (Gippokrat). Boshqa sohalarda qasamyod yo‘q. Ushbu qasamyodingizga loyiq bo‘la olasizmi? Uddalay olishlaringga ishonaman. Mendan nima talab qilinadi? Qanday qilib ishlash uslublaringizni o‘zgartira olasizlar?”, — deydi Prezident.
Shavkat Mirziyoyev rejalar katta ekanini aytib, tibbiyot xodimlari, xuddi o‘qituvchilar singari, 1000 dollar miqdorida ish haqi olishi kerakligini bildirdi.
“Oddiy muallim 1000 dollar ish haqi olmasa, u ishga kelishi kerak emas. Shifokor ham xuddi shunday, 1000 dollar olmasa, ertaga uyga borib bolasini, nabirasini qanday boqadi? Qilishimiz mumkinmi? Mumkin. Tinchlik, osoyishtalik kerak, bir-birimizni to‘g‘ri tushunishimiz kerak”, – deydi davlat rahbari.
Ma’lum qilinishicha, Toshkent shahrida 23 ming nafar o‘qituvchi bor, 500 ta vakant mavjud. Tibbiyot sohasida 498 ta vakant joy bor.
“Ish kerak deymiz, lekin mana ikkita sohada ham 1000 ta vakant turibdi. Nega? Byurokratiya. Sizlarda erkinlik yo‘q. Toshkent shahrida qanday qilsak bo‘ladiki, shu ikki tizimga mukammal ozodlik, mas'uliyat, javobgarlik berib, bolalarimizni yaxshi o‘qitsak?” – dedi Prezident.
Shuningdek, Prezident xususiy va davlat poliklinikalaridagi bosh shifokorlarning ishini taqqoslagan. Uning so‘zlariga ko‘ra, xususiy kasalxonalarning rahbarlari xuddi menejerdek ishlaydi va deyarli bo‘sh vaqti yo‘q.
“Agar 5 daqiqa bo‘sh vaqti bo‘lib qolsa, ular yangilik o‘qiydi… bilim olishga intiladi. Davlat kasalxonalarida bosh shifokor soat 09:00 da keladi, 17:00 da ketadi. Maktab direktori 09:00 dan 18:00 gacha nima ish qiladi, foydali ish koeffitsenti (FIK) qanaqa? Tibbiyot xodimining FIKi qanaqa? Hamma bir xil emasku. Yaxshi va yomonlar bor. Yaxshilarni olib, yomonni o‘rgata olamizmi? Olamiz”, — deydi Shavkat Mirziyoyev.
Avvalroq Shavkat Mirziyoyev ko‘pchilik mamlakatdagi tibbiy xizmatlar sifatidan norozi ekanligini tanqid qilgandi.
