Tashqi mehnat migratsiyasi xorijda ishlamoqchi bo‘lgan fuqarolarni ayrim tashkilotlardan ogohlantirib, ularga murojaat qildi.
Unga ko‘ra, xorijda ishlash istagidagi fuqarolar uchun qo‘shimcha imkoniyatlar yaratish maqsadida mamlakatda 2018-yildan xususiy bandlik agentliklari (XBA) faoliyatiga ruxsat berilgan edi. Biroq, o‘tgan davr mobaynida ayrim XBA tomonidan fuqarolarni aldash va ishonchini suiisteʼmol qilish holatlari sodir etilgan.
Bu kabi salbiy holatlarning oldini olish maqsadida “Xususiy bandlik agentliklari to‘g‘risida”gi qonunga o‘zgartish va qo‘shimchalar kiritilib, 2020-yilning 14-noyabridan ular faoliyatida jiddiy o‘zgarishlar joriy etilgan. Amaldagi tartibga ko‘ra:
- fuqarolarni xorijda ishga joylashtirish bo‘yicha litsenziyaga ega XBA axborot va maslahat xizmatlari uchun BHMning bir baravaridan, yaʼni 330 ming so‘mdan ko‘p pul olishi mumkin emas;
- shuningdek, chet ellik ish beruvchi va hamkori bilan shartnomalar tuzmasdan, fuqarolarga xizmat ko‘rsatish taqiqlanadi hamda ushbu shartnomalar XBAning rasmiy veb-saytida joylashtirilishi lozim.
O‘tgan davr mobaynida XBA reyestridan 118 ta yuridik shaxs ro‘yxatdan o‘tgan bo‘lib, hozirgi kunda ulardan 9 tasi fuqarolarni xorijda ishga joylashtirish huquqini beruvchi litsenziyaga ega.
Shu munosabat bilan, xorijda ishga joylashtirish vakolatiga ega bo‘lmagan tashkilotlar yoki shaxslarga ishonmaslikka, turli ko‘rinishdagi shartnomalarni tuzmaslikka va to‘lovlarni amalga oshirmaslikka chaqirilgan.
“Xorijda ish taklif qilayotgan tashkilotlarning litsenziyasi borligiga ishonch hosil qiling. Shartnoma tuzayotganda, uning shartlarini o‘qib, to‘liq tushunib imzo qo‘ying. Agar XBA bilan nizoli vaziyatlarga duch kelsangiz, Kambag‘allikni qisqartirish va bandlik vazirligiga murojaat qilishingiz mumkin”, — deyiladi xabarda.
Izoh (0)