Jizzax viloyati Sharof Rashidov tumanidagi Ilmiy tajriba stansiyasi tomonidan elektr tarmog‘iga o‘zboshimchalik bilan ulanish holati aniqlandi. Bu haqda “O‘zenergoinspeksiya” matbuot xizmati xabar berdi.
Unga ko‘ra, holat Energetika vazirligi huzuridagi “O‘zenergoinspeksiya” va huquqni muhofaza qiluvchi organlar bilan birgalikda joylarda o‘tkazilayotgan nazorat tadbirlarida aniqlangan. Qishloq xo‘jaligi vazirligi huzuridagi bilim va innovatsiyalar milliy markaziga qarashli ilmiy tajriba stansiyasida elektr energiyasidan noqonuniy foydalanish holati kuzatildi.
Ushbu stansiyada quvvati 40 kVa bo‘lgan transformator punkti elektr energiyasidan foydalanish shartnomasini rasmiylashtirmasdan elektr tarmog‘iga ulangani maʼlum bo‘ldi. Natijada 984,2 ming kVt/soat hisobga olinmagan elektr energiyasi bo‘yicha 442,9 million so‘m miqdorida qayta hisob ishlari amalga oshirildi.
Qoidabuzar isteʼmolchiga nisbatan belgilangan tartibda choralar ko‘rilib, tegishli hujjatlar huquqni muhofaza qiluvchi organlarga taqdim etildi. Nazorat tadbirlari davom etmoqda.
Izoh (0)