Bugun, 11-may kuni O‘zbekiston Ekologik partiyasi markaziy kengashining navbatdan tashqari plenumi bo‘lib o‘tdi. Yig‘ilishda prezidentlikka nomzod masalasi ko‘rib chiqilgan.
O‘zA xabariga ko‘ra, plenumda partiya markaziy kengashi ijroiya qo‘mitasi raisi Abdushukur Hamzayevni O‘zbekiston prezidenti lavozimiga nomzod etib ko‘rsatish bo‘yicha qaror qabul qilindi.
Hozircha boshqa partiyalar nomzodlari maʼlum qilinmadi.
Eslatib o‘tamiz, O‘zbekistonda 2023-yil 9-iyul kuni muddatidan oldin prezidentlik saylovi o‘tkazilishi belgilangan. Markaziy saylov komissiyasi 10-maydan prezidentlik uchun saylov kampaniyasini boshlashni eʼlon qilgan. Saylov okruglarini tuzish 15-maygacha, saylov uchastkalarini tuzish 25-maygacha belgilanmoqda. Bundan tashqari, saylovchilarning yagona elektron ro‘yxati tuziladi.
Siyosiy partiyalar o‘z vakolatli vakillarini ro‘yxatdan o‘tkazish uchun saylov kampaniyasi eʼlon qilinganidan keyin 3 kun muddat ichida Markaziy saylov komissiyasiga murojaat qilishi kerak bo‘ladi. Saylovda ishtirok etish uchun partiyalar 15-maygacha hujjatlarni taqdim etishlari zarur. 17-may—1-iyun oralig‘ida prezidentlikka nomzodlar ko‘rsatiladi.
Izoh (1)
eko partiyaga saylovda nima bor ekalogiya rasvosi chiqib yotibdi shu bilan shugʻullana boʻlmaydimi boshqa davlatlarda eko partiyadagilar oʻrmonlarda tabiatni asrash boʻyicha faoliyat yuritadi biznikilar kastyum shim galustugni afzal koʻradi