Shavkat Mirziyoyev 11-may kuni bo‘lib o‘tayotgan yig‘ilishda hududlarda energiyani tejash masalasiga to‘xtalib o‘tdi. Bu haqda prezident matbuot xizmati xabar berdi.
Qayd etilishicha, Qarshi tumanidagi tadbirkor 10 gektar issiqxonani ko‘mirda isitish loyihasini boshlagan. Loyiha doirasida ko‘mirni sintez qilish orqali yiliga 2,8 million kub metr gaz iqtisod qilinib, 8 million kilovatt soat elektr energiyasi ishlab chiqariladi. Qolgan viloyatlarda ham shunday loyihalarni amalga oshirish bo‘yicha dasturlar qabul qilish zarurligi ta’kidlandi.
Ko‘mirga talab shu yilning o‘zida 1,5 baravarga oshishi kutilayotganini hisobga olib, joriy yilda ko‘mir qazib chiqarishni 5,3 million tonnadan 6,5 million tonnaga olib chiqish zarurligi qayd etildi. Buning uchun “Angren” ko‘mir koniga 80 million dollar kredit ajratiladi, “Sharg‘un ko‘mir”ning birinchi liniyasi ishga tushiriladi. Shuningdek, 14 ta ko‘mir koniga tadbirkorlar jalb qilinadi.
Shavkat Mirziyoyev ko‘mir va uran ishlab chiqarishni kengaytirishga qaratilgan loyihalar taqdimoti bilan tanishgandi. Hozirda energiya ehtiyojini ta’minlash uchun barcha manbalar qatori ko‘mir qazib olish hajmi ham kengaytirilmoqda. Oxirgi besh yilda bu ko‘rsatkich yiliga 4 million tonnadan 5 million 300 ming tonnaga oshirilgan.
Taqdimotda shu borada qilinayotgan ishlar haqida axborot berilgan. Xususan, 2023-yilda “Sharg‘unko‘mir” aksiyadorlik jamiyatini modernizatsiya qilish loyihasi yakunlanadi. Buning evaziga yuqori sifatli ko‘mir qazib olish quvvati 900 ming tonnagacha oshadi. Prezident “Sharg‘un” va “Boysun” konlarini o‘zlashtirish orqali yuqori sifatli ko‘mir ishlab chiqarishni yanada kengaytirish imkoniyati borligini ko‘rsatib o‘tgandi.
Izoh (0)