Andijonning Marhamat tumanida hokim topshirig‘iga ko‘ra ishdan tashqari vaqtda chaqirilgan obodonlashtirish xodimi YTHga uchrab, vafot etgani xabar qilingandi. Mehnat inspeksiyasi holat yuzasidan munosabat bildirdi.
Tekshirish jarayonida ishchilar Mehnat kodeksi talablariga zid ravishda, ya’ni ish vaqtidan tashqari ishlarda, tungi ishlarda, shuningdek, dam olish kunlarida ma’muriy tarzda majburan ishlatib kelinayotgani aniqlandi.
Holat bo‘yicha tuman obodonlashtirish bo‘limi boshlig‘iga nisbatan Ma’muriy javobgarlik to‘g‘risidagi kodeksning 51-moddasi 1-qismiga asosan ma’muriy bayonnoma rasmiylashtirilib, jarima qo‘llangan. Ushbu baxtsiz hodisa ishlab chiqarish bilan bog‘liq deb topilgan va bu bo‘yicha dalolatnoma rasmiylashtirilgan.
Sodir bo‘lgan avtohalokat oqibatida vafot etgan xodimning oila a’zolariga yetkazilgan zarar summasi — marhumaning o‘rtacha olti yillik ish haqi, ya’ni 122 milion 633 ming so‘m miqdoridagi biryo‘la to‘lanadigan nafaqa Mehnat kodeksining 328-moddasi talablariga muvofiq to‘lanishi belgilangan.
Yuz bergan baxtsiz hodisa oqibatida xodimlarning oila a’zolari, farzandlariga boquvchisining vafoti tufayli biryo‘la nafaqa va oyma-oy to‘lanishi lozim bo‘lgan zarar to‘lovlari obodonlashtirish bo‘limi tomonidan amalga oshiriladi va buning ijrosi inspeksiya tomonidan nazoratga olinadi. Maxsus tekshiruv yakuni bo‘yicha hujjatlar rasmiylashtirilib, belgilangan tartibda ichki ishlar organiga yuborilishi ta’minlanadi.
Izoh (1)
Тушунарсиз замон