Samarqand viloyatining Past Darg‘om tumanida hokimlik mansabdori MFY raislariga bosim o‘tkazib, “Mening yo‘lim” loyihasida o‘zi aytgan loyihaga ovoz berishga majburlagani haqida xabar berildi. Bu haqda samarqandlik jurnalist va bloger Farhod Norbo‘tayevning shaxsiy Telegram kanalida maʼlum qilindi.
Maʼlum bo‘lishicha, Past Darg‘om tumani hokimligida Kambag‘allikni qisqartirish va bandlik bo‘lim boshlig‘i lavozimida faoliyat yuritayotgan Tohir Qosimov Telegram messenjeridagi guruh orqali tumandagi MFY raislariga bosim o‘tkazib, ishdan bo‘shatish bilan qo‘rqitib, ularga o‘zi aytgan loyihaga ovoz berish majburiyatini qo‘ygan.
Manba tarqatgan skrinshotlarda mansabdor “Tezlashtiringlar, soat 12 da ovoz berish jarayoni tugaydi. Hurmatli raislar, xulosa qilinglar, xafa bo‘lmasalaringiz bo‘ldi”, — deya ularga bosim o‘tkazishga uringanini ko‘rish mumkin.
“Prezident tashabbusi bilan tatbiq etilgan ‘Mening yo‘lim’ loyihasi ayrim chegara bilmas amaldorlarning asl basharasini fosh qildi. Ana shunday ‘mushtumzo‘r’ kimsalar qilayotgan ‘xizmatlari’ ortidan odamlarning davlat va hukumatga nisbatan ishonchi tobora yo‘qolib bormoqda”, — deydi Farhod Norbo‘tayev bu haqda jamoatchilikka xabar berar ekan.
MFY raislarini ovoz berishga majburlagan mansabdor Sherzod ismli boshqa bir xodimiga MFY raislarini chaqirib, ularning pattasini olishi kerakligini uqtiradi.
Tohir Qosimov zo‘ravonligini davom ettirib, Telegram guruhida “Shuncha gap yetib bormadimi?”, deya o‘dag‘aylaydi. “Beshnayman” MFY raisiga murojaat qilib, “jinnimisiz, bu boshqa loyiha”, deya dakki beradi. “Oqmang‘it”, “Do‘stlik”, “Yangiravot”, “Bahor” MFY raislariga o‘zlari tashabbus qilib chiqqan loyihaga ovoz berishni to‘xtatib, u aytgan loyihaga ovoz berishlari kerakligini uqtiradi. Va bu bo‘yicha hisobot berishlari kerakligini aytadi. Yana bir yozishmada esa “Ko‘pchilik MFY raislari adashib kelib qolganga o‘xshaysizlar, qo‘llaringizni ko‘tarib ketsalaringiz bo‘ladi”, — deydi.
“Daryo” mazkur holat yuzasidan Past Darg‘om tumani hokimi Vahobjon Murodqobilov bilan telefon orqali bog‘lanib, tumanda bunday holat yuz bergani sababi bilan qiziqdi.
“Bu holatdan hozir xabar topdim va o‘zim uchun dastlabki xulosani chiqardim. Ammo Sizga ayni paytda biror gap aytolmayman. Lekin vaziyatni nazoratga olib, holatni batafsil o‘rganib chiqqanimdan so‘ng fikrimni bayon qilaman”, — dedi tuman hokimi Vahobjon Murodqobilov.
Telegeram guruhidagi bu zo‘ravonlikka, majburlashga fikr bildirgan Samarqand viloyati Kambag‘allikni qisqartirish va bandlik bosh boshqarmasi holat nazoratga olinganini bildirdi.
“Boshqarma axborot xizmati o‘rganishlar natijasi bo‘yicha qo‘shimcha maʼlumot beradi”, — deyiladi masʼullarning rasmiy munosabatida.
Izoh (0)