Samarqand viloyati Kattaqo‘rg‘on tumanidagi xususiy bog‘chada to‘rt yoshli bola kaltaklangani aytilmoqda.
Maʼlum qilinishicha, bola tumanning Valijon qishlog‘ida yashaydi. Voqea 20-aprel kuni bog‘cha hududida sodir bo‘lgan. Uning onasi voqeani surishtirganida turli tarbiyachilardan turlicha maʼlumot olgan. Shu sababli ham uni o‘z tarbiyachisi urgan, degan qarorga kelgan.
“Soat 8 da bog‘chaga olib borgan edim. Hech qayerida jarohat yo‘q edi. Soat 16:20 da bolamni olgani bordim. Borsam burni shishgan ekan. Nima bo‘lganini so‘rasam, bog‘cha opasi sirk kelganini aytib, sirk oldida stulda yiqilib tushdi, dedi. U menga shunaqa maʼlumot berdi. Turli bog‘cha opalar turlicha maʼlumot berdi. Shu sababli bog‘cha opasi urdi, degan qarorga keldim”, — deydi bolaning onasi.
Bola 20-aprel kuni kechki soat 18:00 lar atrofida tuman tibbiyot birlashmasining jarrohlik bo‘limiga olib kelingan va shu yerda 7 kun davomida davolangan. U bosh miya chayqalishi diagnozi bilan bo‘limga yotqizilgan.
Bog‘cha mudirasining so‘zlariga ko‘ra, voqea sodir bo‘lgan kuni uni boshqa bir bola yiqitib yuborgan bo‘lgan. Biroq onasi olib ketayotgan vaqtda unda hech qanday bezovtalanish holatlari kuzatilmagan.
“Yonidagi sherigi bilan talashib qolgan, o‘zi judayam sho‘x bola. Keyin Mashhurbekni itarib yuborgan, yiqilgan va burni qonagan. Tarbiyachisi tez yordam ko‘rsatib, burni qonaganini to‘xtatgan. Soat 5 larda onasi kelgan, lekin bola bezovta bo‘lmadi, yig‘lamadi ham hattoki”, — deydi mudira.
Shuningdek, bolaning tarbiyachisi holat uning eʼtiborsizligi sabab yuzaga kelganini, qattiq pushaymon ekanligini aytib, ishdan o‘z arizasiga binoan bo‘shaganini maʼlum qildi.
Viloyat Maktabgacha va maktab taʼlimi bo‘limi axborot xizmatining maʼlum qilishicha, holat Kattaqo‘rg‘on tumani maktabgacha va maktab taʼlimi bo‘limining tegishli masʼullari tomonidan o‘rganib chiqildi.
Aytilishicha, 20-aprel kuni soat 10:30 larda Kattaqo‘rg‘on tumani Valijon qishlog‘ida joylashgan YATT “Salimova Mamlakat” ONMTT tarbiyachisi o‘yin maydonchasiga tarbiyalanuvchilarni olib chiqqan. Tarbiyalanuvchi M.M. o‘rtog‘i U.A. bilan arg‘imchoq uchish uchun talashib, arg‘imchoqning metal ustuniga burni bilan yiqilgan, natijada burni qonagan.
Tarbiyachi tezda M.M.ga birinchi tibbiy tez yordam ko‘rsatgan. Muolaja natijasida M.M.ning burni qonashi to‘xtagan. O‘sha kuni tarbiyalanuvchi M.M.da bezovtalik holati bo‘lmagani sababli tibbiyot birlashmasiga olib borilmagan.
M.M.ning onasi bolaning burun qismidagi tan jarohatini ko‘rib, tarbiyachi tomonidan kaltaklangani to‘g‘risida shubha-gumonga borgan. Ayni paytda ota-ona huquqni muhofaza qilish organlariga murojaat qilgan.
Holat yuzasidan tuman ichki ishlar bo‘limi tomonidan o‘rganish ishlari olib borilmoqda.
Izoh (0)