Joriy yilning 5-may kuni Londonda Davlat-xususiy sheriklik (DXSH) sohasidagi nufuzli Partnership Awards 2023 xalqaro mukofotini topshirish marosimi bo‘lib o‘tdi. Tadbirda O‘zbekistonning “Namangan shahridagi oqova suv tozalash inshootlari”ni qurish loyihasi “Kommunal sektorning eng yaxshi loyihasi” nominatsiyasida g‘olib deb topildi. Bu haqda Iqtisodiyot va moliya vazirligi xabar berdi.
Maʼlum qilinishicha, “Namangan shahrining oqova suvlarini tozalash inshootlari” loyihasi respublikada ichimlik suvi taʼminoti va oqova suv xizmatlarini ko‘rsatish bo‘yicha DXSHning tajriba loyihasi hisoblanadi. Loyiha tenderida 23 ta kompaniya ishtirok etgan bo‘lib, ikki bosqichli tender ochiq va shaffof tarzda o‘tkazilgan. Tender natijalariga ko‘ra, shartnoma Metito kompaniyasiga taqdim etildi. Kompaniya BAAda joylashgan bo‘lib, suv resurslarini boshqarish yechimlarini yetkazib beruvchi global investor hisoblanadi.
“Namangan shahrining oqova suvlarni tozalash inshootlari” loyihasi kuniga 100 ming kub metr bo‘lgan yangi oqova suvlarni tozalash imkoniyatiga ega bo‘ladi. Loyiha shahar va uning atrofidagi beshta tumanga xizmat ko‘rsatadigan 7,5 kilometr uzunlikdagi oqova suv tarmog‘ini qurishni nazarda tutadi. Loyiha amalga oshirilishi natijasida hududdagi 1,8 million nafargacha bo‘lgan aholiga to‘laqonli xizmat ko‘rsatish imkoniyati yaratiladi. Partnership Awards mukofotiga loyiq ko‘rilishi loyihaning ilg‘or xalqaro DXSH standartlariga muvofiq amalga oshirilishini, uning ijtimoiy va ekologik ahamiyati yuqori ekanini ko‘rsatadi. Shuningdek, loyihaning barcha ishtirokchilari tomonidan amalga oshirilgan ishlarning yuqori samaradorligini va sektorda qabul qilingan loyiha qarorlarini aks ettiradi”, — deyiladi xabarda.
Iqtisodiyot va moliya vaziri o‘rinbosari Ilhom Norqulov mazkur xalqaro mukofoti yuzasidan o‘z fikrlarini bildirib, O‘zbekiston DXSH dasturi mamlakatimiz uchun burilish nuqtasi ekanini eʼtirof etgan.yu
“Xususiy sektor bilan hamkorlik tufayli talab yuqori bo‘lgan infratuzilma loyihalarini amalga oshirish uchun zarur kapitalni moliyaviy va resurs bilan taʼminlashni sezilarli darajada oshirmoqdamiz. Ushbu loyihalar tufayli bugungi kunda oldimizda turgan ijtimoiy ahamiyatga ega muammolarni yanada samarali hal etishga hissa qo‘shmoqdamiz. Eng muhimi, biz bu jarayonda tajriba almashamiz va yangi imkoniyatlarni ochib berishga imkon beradigan global standartlar va innovatsiyalar bilan mahalliy tanishuvimizni targ‘ib qilamiz.
Bizda uzoq yo‘l bor, lekin biz marraga erishish uchun muhim bosqichlarni bosib o‘tdik. O‘zbekistonning ketma-ket ikkinchi yil “Partnership Awards” g‘olibi deb eʼlon qilinishi xalqaro hamjamiyat tomonidan mamlakatimizda DXSH sektorini rivojlantirish borasidagi ishlarning muvaffaqiyatli amalga oshirilayotganidan dalolat beradi”, — degan vazir o‘rinbosari.
Maʼlumot uchun, 2022-yilda O‘zbekiston Moliya vazirligi huzuridagi Davlat-xususiy sheriklikni rivojlantirish agentligi Partnership Awards mukofotining “Yil targ‘ibotchisi” nominatsiyasida g‘olib bo‘lgan. Mukofot 20 yildan beri xalqaro maydonda DXSH sohasida yutuqlarga erishgan davlatlarning loyihalariga topshirib kelinadi. Loyihalar dunyodagi yetakchi ekspertlar tomonidan baholab boriladi.
Izoh (0)