Самарқанд вилоятининг Паст Дарғом туманида ҳокимлик мансабдори МФЙ раисларига босим ўтказиб, “Менинг йўлим” лойиҳасида ўзи айтган лойиҳага овоз беришга мажбурлагани ҳақида хабар берилди. Бу ҳақда самарқандлик журналист ва блогер Фарҳод Норбўтаевнинг шахсий Telegram каналида маълум қилинди.
Маълум бўлишича, Паст Дарғом тумани ҳокимлигида Камбағалликни қисқартириш ва бандлик бўлим бошлиғи лавозимида фаолият юритаётган Тоҳир Қосимов Telegram мессенжеридаги гуруҳ орқали тумандаги МФЙ раисларига босим ўтказиб, ишдан бўшатиш билан қўрқитиб, уларга ўзи айтган лойиҳага овоз бериш мажбуриятини қўйган.
Манба тарқатган скриншотларда мансабдор “Тезлаштиринглар, соат 12 да овоз бериш жараёни тугайди. Ҳурматли раислар, хулоса қилинглар, хафа бўлмасаларингиз бўлди”, — дея уларга босим ўтказишга уринганини кўриш мумкин.
“Президент ташаббуси билан татбиқ этилган ‘Менинг йўлим’ лойиҳаси айрим чегара билмас амалдорларнинг асл башарасини фош қилди. Ана шундай ‘муштумзўр’ кимсалар қилаётган ‘хизматлари’ ортидан одамларнинг давлат ва ҳукуматга нисбатан ишончи тобора йўқолиб бормоқда”, — дейди Фарҳод Норбўтаев бу ҳақда жамоатчиликка хабар берар экан.
МФЙ раисларини овоз беришга мажбурлаган мансабдор Шерзод исмли бошқа бир ходимига МФЙ раисларини чақириб, уларнинг паттасини олиши кераклигини уқтиради.
Тоҳир Қосимов зўравонлигини давом эттириб, Telegram гуруҳида “Шунча гап етиб бормадими?”, дея ўдағайлайди. “Бешнайман” МФЙ раисига мурожаат қилиб, “жиннимисиз, бу бошқа лойиҳа”, дея дакки беради. “Оқманғит”, “Дўстлик”, “Янгиравот”, “Баҳор” МФЙ раисларига ўзлари ташаббус қилиб чиққан лойиҳага овоз беришни тўхтатиб, у айтган лойиҳага овоз беришлари кераклигини уқтиради. Ва бу бўйича ҳисобот беришлари кераклигини айтади. Яна бир ёзишмада эса “Кўпчилик МФЙ раислари адашиб келиб қолганга ўхшайсизлар, қўлларингизни кўтариб кетсаларингиз бўлади”, — дейди.
“Дарё” мазкур ҳолат юзасидан Паст Дарғом тумани ҳокими Ваҳобжон Муродқобилов билан телефон орқали боғланиб, туманда бундай ҳолат юз бергани сабаби билан қизиқди.
“Бу ҳолатдан ҳозир хабар топдим ва ўзим учун дастлабки хулосани чиқардим. Аммо Сизга айни пайтда бирор гап айтолмайман. Лекин вазиятни назоратга олиб, ҳолатни батафсил ўрганиб чиққанимдан сўнг фикримни баён қиламан”, — деди туман ҳокими Ваҳобжон Муродқобилов.
Телегерам гуруҳидаги бу зўравонликка, мажбурлашга фикр билдирган Самарқанд вилояти Камбағалликни қисқартириш ва бандлик бош бошқармаси ҳолат назоратга олинганини билдирди.
“Бошқарма ахборот хизмати ўрганишлар натижаси бўйича қўшимча маълумот беради”, — дейилади масъулларнинг расмий муносабатида.
Изоҳ (0)