“Yuksalish” O‘zbekiston bayrog‘i rangidagi tasma taqqan yigit ishi bo‘yicha tafsilotlarni ochiqlashga chaqirdi

Qashqadaryo viloyati Qamashi tumanidagi bozorda huquq-tartibot idoralari xodimlari O‘zbekiston bayrog‘i rangidagi va “Bitiruvchi” yozuvi bo‘lgan tasma taqqan yigitni qo‘lga olgandi. “Yuksalish” ushbu ish bo‘yicha tafsilotlarni ochiqlashga chaqirdi.

5-may kuni Qashqadaryo viloyati IIB fuqaro R.I. ushbu tasmani yechib qo‘yish bo‘yicha profilaktika inspektorlarining qonuniy talablariga bo‘ysunmaganini, holat yuzasidan fuqaroga tegishli moddalar bilan hujjatlar rasmiylashtirilganini hamda jinoyat ishlari bo‘yicha Qamashi tuman sudiga yuborilganini ma’lum qildi.

“Keyinroq esa ma’muriy huquqbuzarlik to‘g‘risida ish qo‘zg‘atish haqida qabul qilingan noqonuniy qaror Bosh prokuratura aralashuvi bilan bekor qilindi, bayroq rangidagi tasma taqqan yigitning noqonuniy jazolanishi bartaraf etildi. Adolat qaror topdi.  

Biroq fuqaroga noqonuniy talab qo‘ygan, tegishli hujjatlarni rasmiylashtirgan va javobgarlikka tortish uchun sudga yuborgan IIB xodimlari hamda noqonuniy qaror qabul qilgan sudning harakatlariga qanday baho berilgani masalasi mavhumligicha qolmoqda.

Boshqacha aytganda, adolat qaror topdi, biroq qonun ustuvorligi to‘laqonli ta’minlandimi, degan savol ochiq qolmoqda. 8-may kuni referendum natijalariga bag‘ishlangan uchrashuvda  prezident barcha sohalarda qonun ustuvorligi ta’minlanishi, qonunlardagi noaniqliklar inson foydasiga hal bo‘lishi, har qanday holatda adolatni qaror toptirish shart degan qarash mansabdorlar uchun hayot qoidasiga aylanishi kerakligini ta’kidladi. 

Shu munosabat bilan, keng jamoatchilikning va “Yuksalish” harakati a’zolarining murojaatlariga asoslanib, tegishli idoralar masala yuzasidan batafsil axborot berishi maqsadga muvofiq, deb hisoblaymiz», — deyiladi harakat rahbari Bobur Bekmurodov tomonidan e’lon qilingan postda.

2022-yil noyabrda Qonunchilik palatasidagi O‘zLiDeP fraksiyasining kengaytirilgan yig‘ilishida “O‘zbekiston Respublikasining Davlat bayrog‘i to‘g‘risida”gi qonunga tegishli o‘zgartish va qo‘shimchalar kiritish tashabbusini ilgari surib, muhokama tashkil etish va deputatlar orasidan ishchi guruh tuzish ko‘zda tutilgani ma’lum bo‘lgandi. O‘shanda O‘zLiDep lideri Aktam Hayitov bayroq O‘zbekiston suverenitetining ramzi ekanini qayd etib, bayroqning kundalik hayotda doimiy hamrohga aylanishi davlatda yashovchi barcha millat va elat vakillarini jipslashtirishda muhim o‘rin tutishini ta’kidlagan.