AQSH Mudofaa vazirligining matbuot kotibi Patrik Rayder ukrainalik harbiylar Patriot havo hujumidan mudofaa tizimlari yordamida Rossiyaning “Kinjal” gipertovushli raketasini urib tushirganini tasdiqladi.
“Ular Patriot havo hujumidan mudofaa tizimlari yordamida Rossiya raketasini urib tushirganliklarini tasdiqlay olaman. Bilasizki, mazkur tizim AQSH va xalqaro hamjamiyat Ukrainaga havo hujumidan himoyalanish borasidagi taqdim etgan keng ko‘lamli yordamning bir qismi hisoblanadi”, — deydi Pentagon vakili.
Ukraina Qurolli kuchlaring Havo kuchlari qo‘mondoni Nikolay Oleshuk o‘tgan hafta Patriot Rossiya tomonidan 4-may kuni kechasi uchirilgan “Kinjal” raketasini urib tushirganini ma’lum qildi. Qo‘mondonning so‘zlariga ko‘ra, Rossiya hududidagi “MiG-31K” samolyotidan uchirilgan X-47 raketasi Kiyev viloyati osmonida yo‘q qilingan.
Ukraina Qurolli kuchlari “Kinjal”ni urib tushirgani haqida birinchi bo‘lib Defense Express portali xabar berdi. Mamlakat Havo kuchlari avvaliga ushbu ma’lumotni rad etib keldi. Rossiya Mudofaa vazirligi ham holatga hech qanday izoh bermadi.
2022-yil avgustda Rossiya mudofaa vaziri Sergey Shoygu “Kinjal” gipertovushli raketasini “aniqlash ham, tutib qolish ham imkonsiz” ekanini aytgandi.
AQSH Ukrainaga 1,2 milliard dollarlik yangi harbiy yordam paketini e’lon qilishi mumkinligi to‘g‘risida xabar berilgandi. Harbiy yordam paketidan Hawk havo hujumidan mudofaa tizimlari, havo hujumidan mudofaa qiluvchi qurollar, gaubitsalar, shuningdek, dronlarga qarshi o‘q-dorilar o‘rin oladi.
Izoh (0)