АҚШ Мудофаа вазирлигининг матбуот котиби Патрик Райдер украиналик ҳарбийлар Патриот ҳаво ҳужумидан мудофаа тизимлари ёрдамида Россиянинг “Кинжал” гипертовушли ракетасини уриб туширганини тасдиқлади.
“Улар Патриот ҳаво ҳужумидан мудофаа тизимлари ёрдамида Россия ракетасини уриб туширганликларини тасдиқлай оламан. Биласизки, мазкур тизим АҚШ ва халқаро ҳамжамият Украинага ҳаво ҳужумидан ҳимояланиш борасидаги тақдим этган кенг кўламли ёрдамнинг бир қисми ҳисобланади”, — дейди Пентагон вакили.
Украина Қуролли кучларинг Ҳаво кучлари қўмондони Николай Олешук ўтган ҳафта Патриот Россия томонидан 4 май куни кечаси учирилган “Кинжал” ракетасини уриб туширганини маълум қилди. Қўмондоннинг сўзларига кўра, Россия ҳудудидаги “МиГ-31К” самолётидан учирилган Х-47 ракетаси Киев вилояти осмонида йўқ қилинган.
Украина Қуролли кучлари “Кинжал”ни уриб туширгани ҳақида биринчи бўлиб Defense Express портали хабар берди. Мамлакат Ҳаво кучлари аввалига ушбу маълумотни рад этиб келди. Россия Мудофаа вазирлиги ҳам ҳолатга ҳеч қандай изоҳ бермади.
2022 йил августда Россия мудофаа вазири Сергей Шойгу “Кинжал” гипертовушли ракетасини “аниқлаш ҳам, тутиб қолиш ҳам имконсиз” эканини айтганди.
АҚШ Украинага 1,2 миллиард долларлик янги ҳарбий ёрдам пакетини эълон қилиши мумкинлиги тўғрисида хабар берилганди. Ҳарбий ёрдам пакетидан Hawk ҳаво ҳужумидан мудофаа тизимлари, ҳаво ҳужумидан мудофаа қилувчи қуроллар, гаубицалар, шунингдек, дронларга қарши ўқ-дорилар ўрин олади.
Изоҳ (0)