Rossiya kuchlari birinchi marta Ukraina hududini bir vaqtning o‘zida 6 ta “Kinjal” gipertovushli raketalar bilan o‘qqa tutdi. Bu haqda UNIAN xabar berdi.
Rossiya turli turdagi raketalar bilan Ukrainaga zarba bergan. Ukraina qurolli kuchlari harbiy-havo kuchlari spikeri Yuriy Ignat bu bo‘yicha ma’lumot bergan.
“Avval bunaqasi bo’lmagan. Dushman tomonidan jami oltita ‘Kinjal’ uchirilgan. Turli xil samolyotlar, xususan, strategik uzoq masofaga uchuvchi aviatsiya va ‘MiG-31K’ ishlatilgan”, — dedi u.
Ignat mamlakat hududiga uchirilgan Rossiyaning X-22, ‘Kinjal’ va C-300 raketalarini Ukraina armiyasi urib tushira olmasligini qo‘shimcha qildi. “Ular bizga xavf tug‘dirmoqda”, — dedi u.
Ta’kidlanishicha, Kiyev shahriga uchirilgan “Kinjal” tipidagi aeroballistik raketa infratuzilma obyektiga urilgan. Poytaxtda havo hujumidan ogohlantirish tizimi deyarli 7 soat ishlagan.
“Raketa hujumi paytida Rossiya Shahed kamikadze dronlaridan tortib, deyarli barcha turdagi qanotli raketalargacha foydalangan. Havo hujumidan mudofaa tizimlarimiz qanotli raketalar va dronlar bilan zarba berishni oldini oldi. Afsuski, ‘Kinjal’ tipidagi aeroballistik raketa infratuzilma obyektini nishonga oldi”, — deydi Kiyev shahar harbiy boshqarmasi rahbari Sergey Popko.
Izoh (0)