Yevropaning eng “velosipedlashgan” davlati Daniya hisoblansa, undan keyingi o‘rinlarda Niderlandiya, Belgiya va Germaniya keladi. Velosiped ixlosmandlari uchun eng qulay nemis shahri Myunster sanaladi. Biroq Germaniyada, jinoyat politsiyasi idorasining ma’lumotlariga ko‘ra, har yili 335 mingga yaqin velosiped o‘g‘riligi sodir etiladi. Aslida raqamlar bundan ham yuqori bo‘lishi mumkinligi rad etilmagan.
Shuning uchun Germaniyada velosipedlar uchun o‘g‘rilikdan, baxtsiz hodisalardan, tungi o‘g‘riliklardan sug‘urta tizimi mavjud. Velosipedchilarning huquqlari Umumgerman veloklubi (ADFC) va hududiy tashkilotlar tomonidan himoya qilinadi. Yo‘llarda qoidabuzarlik sodir etgan velosipedchilar uchun qonunda bir qator jarimalar ko‘zda tutiladi. Masalan, rulda vaqti telefonda suhbatlashish 25 yevro, qorong‘uda chiroqlarni yoqmaslik 20 yevro, svetoforning qizil chirog‘ida o‘tib ketish 45 dan 160 yevrogacha to‘lashga olib keladi. Bundan tashqari, 1,6 promilldan yuqori mast holdagi boshqaruv ham taqiqlanadi.
Har yili olmon diyorida “Ishga velosipedda” aksiyasi o‘tkaziladi. Ishtirokchilar ADFC saytida ro‘yxatdan o‘tib 1-maydan 31-avgustgacha ofisgacha velosipedda borgan kunlarini belgilab borishadi. Ular bir-biri bilan bosib o‘tgan masofalar borasida bellashib, ijtimoiy tarmoqlarda #mitdemradzurarbeit heshtegi bilan rekordlarini yozib, sovrinlar o‘ynashadi. Velomarafonlar-u, veloko‘rgazmalar esa Germaniya uchun odatiy an’anaga aylangan.
Umumgerman veloklubi (ADFC) 160 mingdan ortiq a’zoga ega. Har yili ushbu klub safarlar soni va maxsus so‘rovnoma orqali mamlakat bo‘ylab eng mashshur ko‘p kunlik yo‘nalishlarni aniqlaydi. 2021-yilda Germaniyada 3,9 million mana shunday ko‘p kunlik velosayohatlar amalga oshirilgan. 2019-yilda, ya’ni pandemiyadan avval bu raqam 5,4 milliontani tashkil etgan. Ammo shu bilan birga 1 kunlik velosayohatlar soni ancha ommalashgan. Masalan, 2021-yilda 41 million aholi vakili hech bo‘lmasa 1 marta mana shunday qisqa safarga chiqqan.
“Daryo” fotomuxbiri Madina Nurman Berlin va Potsdam shaharlarida bo‘lib, u yerdagi velosipedchilarning e’tiborga molik suratlarini taqdim etdi.
Izoh (0)